Leilaun PRADO PN Sosiedade Sivíl Husu Tribunál Audit

0
134
Peskizadór La´o Hamutuk, Juvinal Dias. Foto espesiál

DILI (TATOLI)–Porta Vóz Koligasaun Sosiedade Sivíl (KSS), Juvinal Dias husu ba Tribunál Kontas no Komisaun Anti Korrupsaun (KAK) atu halo audit no investiga Membru Parlamentu Nasionál (PN) kona-bá manipulasaun regra hodi leilaun karreta Prado hamutuk 65.

“Ami haree katak Lei Nú.15/2008 kona-ba organizasaun no Funsionamentu Administrasaun Parlamentár fó Autónomu Patrimonial ba PN iha artigu 3 alínea 1, maibé la signifika atu deputadu sira bele deside rezolusaun autónomu ne’ebé hasees prinsípiu governasaun di’ak no boa fé iha PN hodi Leilaun Karreta Prado” Juvinal Dias afirma iha konferénsia Imprensa iha JSMP, Kaikoli, Kuarta, (16/8).

Juvinal dehan, KSS haree katak leilaun karreta konsidera korrupsaun tanba deputadu sira uza podér polítiku hodi halo rezolusaun atu benefísiu sira nia an. Nune’e, husu ba Tribunál Kontas no KAK atu halo audit no halo investigasaun hodi justifika aktu regulár no irregular sira.

Preokupasaun seluk mak valór osan ne’ebé konsellu deside ba kada karreta ho U$ 8.000.00 nu’udar desizaun ne’ebé hatuur vontade mukit ba Estadu Timor-Leste nia ekonomia di’ak no fo de’it naha todan ba Finansa públiku nian.

Nune’e KSS husu ba PN atu bele dada fali polítika ho sensibilidade mukit ba nasaun nia situasaun no entrega Prado ba Estadu atu jere. Tanba bainhira akontese leilaun sei nakonu ho konflitu interese, iha abuzu poder, koluzaun, korrupsaun no fó poténsia boot ba Estadu atu lakon valór ne’ebé loloos

Rekomenda ba deputadu sira Lejizlatura IV atu la presiza sosa tan karreta foun maibé bele uza nafatin karreta ne’e ba tinan lima oin mai, atu nune’e bele poupa osan estadu ho tokon U$ 2.925.000.00 iha tinan ne’e.

“Ami bolu atensaun ba Tribunál Kontas atu bele halo audit no KAK tanba ami konsidera desizaun ne’e nakonu ho konflitu ba interese, korrupsaun, halakon povu nia osan,” nia fó hanoin.

(Jornalista : Zezito Silva)

 (Editór : Manuel Pinto)

HUSIK IDA HATÁN