Leilaun Prado, MUTL “Hotar” Deputadu

0
392
MUTL halo asaun pasifika hasoru Parlamentu Nasional kona-ba Leilaun Kareta Prado, asaun ne'e iha Kampus Sentral Universidade Nasional Timor Lorosa'e (UNTL) ohin.

DILI (TATOLI) – Movimentu Universitáriu Timor-Leste (MUTL), ohin, Kinta (17/08) hotar membru Parlamentu sira tan de’it deputadu/a sira ne’e hamosu rezolusaun ida hodi leilaun karreta xapa mean MP ne’ebé Parlamentu sosa ho osan povu nian hodi fó ba deputadu sira iha tinan lima kotuk ba.

MUTL sente la justu ba desizaun III lejizlatura tanba karreta ho marka Prado ne’ebé antes ne’e sosa ho folin osan dolar amerikanu 63.000 kada unidade ida multiplika ba unidade 65 (ita bele sura rasik) uza iha tinan lima nia laran ho manutensaun rotina ho osan povu nian iha tinan lima deside leilaun  ho folin baratu osan dolar amerikanu 8.000.

Porta Vóz Movimentu Universitáriu Timor-Leste (MUTL), Miguel Arcanjo Moniz da Silva afirma, desizaun Parlamentu Nasionál III lejizlatura ba leilaun kareta prado 65 hanesan diskriminasaun sosiál, inklui viola prinsípiu luta ba libertasaun povu tanba la komunga prinsípiu efisiénsia ba utilizasaun patrimóniu estadu nian.

“Ha’u garante ho ha’u nia vontade tomak reprezenta eroi sira ne’ebé naklekar iha fatin hotu ho sira nia ruin ho ran, hodi hateten ba deputadu sira katak hahalok ne’e sira kriminaliza sira nia an rasik kuandu sira uza karreta hodi halo movimentasaun,” Miguel Arcanjo da Silva ba Ajénsia TATOLI ohin iha ámbitu asaun pasífiku ne’ebé halo hasoru PN iha Kampus Sentrál Universidade Nasionál Timor-Lorosa’e (UNTL).

Iha sorin seluk, membru MUTL, Noe Bernardino Ximenes hateten, asaun demonstrasaun ne’e halo tanba Deputadu PN hamosu indikasaun korrupsaun legál ne’ebé diretamente membru PN hamutuk 65 vota ho unanimidade hodi halo leilaun karreta Prado ne’ebé sira uza iha sira nia mandatu.

Lori MUTL nia naran Nia apela ba povu Timor-Leste liuliu veteranu sira, matebian, rai lulik, foho lulik no ran ho ruin ne’ebé naklekar iha Timor laran tomak atu fó julgamentu ba sira (deputadu/a).

“MUTL hakarak hato’o katak sei la konkorda totál ba leilaun karreta Prado nu’udar patrimóniu Estadu tanba patrimóniu Estadu povu mak nain,” nia akresenta.

Hodi hatutan katak MUTL prontu lakon nia vida bainhira desizaun parlamentu nasionál la fó rezultadu pozitivu.

“Ami prontu atu lakon vida ba injustisa sosiál,” Ela Variana reforsa.

Parte seluk, membru MUTL, Noe Bernardino Ximenes afirma, membru MUTL sei la hakiduk atu husik de’it situasaun ne’e la’o.

“Ami sei la fó tempu tanba luta ne’e ami hahú kedas iha 2007 hodi intervene membru PN hodi labele hola kareta lusu tanba povu Timor-Leste barak mak sei kiak no barak mak sei sofre”, afirma tan.

Konsellu Administrasaun Parlamentár iha PN deside atu halo leilaun ba kareta prado 65 ne’ebé durante ne’e uza hosi membru PN ba III lejislatura.

Kareta prado hirak ne’e sosa hosi Orsamentu Jerál Estadu 2012 liuhosi ajudikasaun  direita ba kompañia Auto Timor-Leste ho folin liu tokon haat Dolar Amerikanu.

Konsellu Administrasaun Parlamentár determina folin ba leilaun kareta ho valor U$ 8.000.00 ne’ebé iha tinan lima liu ho sosa ho folin U$ 63,000.

(Jornalista : Zezito Silva)

(Editór : Manuel Pinto)

 

HUSIK IDA HATÁN