Laiha Laboratóriu Difikulta Serbisu AIFAESA

0
39
Foto/Google.

DILI, (TATOLI) – Hahán no hemun ne’ebé iha Timor-Leste barak liu importa husi rai-liur. Atu asegura podutu importasaun ba konsumidór sira maka laboratóriu sai hanesan fatin importante ba Autoridade Inspesaun no Fiskalizasaun ba Atividade Ekonómika no Sanitária (AIFAESA) hodi bele halo teste ba kualidade hahán maibé daudaun ne’e laiha laborátoriu maka difikulta serbisu AIFAESA.

Ho kestaun ne’e, husu ba Governu da-hituk mai atubele toma atensaun hodi fasilita laboratóriu ba serbisu AIFAESA nian hodi garante ai-han ne’ebé tama mai Timor-Leste.

Diretór Operasaun AIFAESA, Gabriel da Costa hatete bainhira iha tinan 2018 mak Governu no Parlamentu Nasionál tau atensaun ba laboratóriu maka iha tinan oin AIFAESA asegura hahán ne’ebé tama mai Timor-Leste tenke halo teste uluk hafoin haruka tama.

“Ida ne’e mak ita foin bele hatene katak ita-nia konsumidór sira, ita rasik mós bele konsumu hahán ka bee ne’ebé ita durante ne’e deskonfia, ita sente bele sai husi buat kímiku sira tanba falta laboratóriu nune’e sasán sira mai ne’e fasil”, Gabriel informa iha Matadouru, ohin.

Nune’e AIFAESA husu ba Governu foun atubele haree tanba servisu AIFAESA nian importante tebes atu asegura ema iha Timór laran tomak maka Governu tenke sosa laboratóriu hodi nune’e bele hatene produtu importadu sira tenke halo teste iha AIFAESA mak foin bele sirkula iha rai-laran hodi konsumu maibé kuandu labele tenke apreende (foti) ka haruka fila no halo destruisaun .

“Nune’e AIFAESA husu ba ita-nia membru Parlamentu ne’ebé sei halo tomada pose tenke tau orsamentu  ba AIFAESA tanba laboratóriu importante tebes. Ba hahán loroloron nia kuandu laboratóriu iha ona ne’e di’ak. Husu ba Parlamentu no Governu foun keta haluha orsamentu ba sosa laboratóriu”.

Jornalista: Maria Auxiliadora

Editora: Rita Almeida

HUSIK IDA HATÁN