Kompañia Star Product Lda Sei Harii Indústria Resiklajen Plástiku

0
142
Ministru Constâncio Pinto no Vise-Ministru Obra Públika, Transporte no Komunikasaun, Inácio Freitas Moreira partisipa iha lansamentu fatuk dahuluk ba indústria resiklajen plástiku iha Lesibutak-Manleuana.

DILI, (TATOLI) – Kompañia Star Product Lda ne’ebé hetan ajudu orsamentu husi Ministériu Komérsiu Indústria no Ambiente (MKIA) ho montante mil U$289 husi orsamentu transferénsia públika sei harii indústria resiklajen plástiku ba dahuluk iha Timor-Leste hodi hatudu sira-nia kompromisu no seriedade ba jestaun lixu hodi prodús fali ba kadeira.

Indústria resiklajen ne’ebé harii husi ema timoroan ne’e ho objetivu hanesan ho Governu nian mak oinsá kria empregu no hadi’a ambiente nomós redús importantasaun liuliu produtu ne’ebé halo ho plástiku, tanba tuir kompañia nia haree katak Timor-Leste oras ne’e sei falta solusaun ne’ebé apropriada ba prosesu tratamentu lixu doméstiku.

Tuir peskiza ne’ebé hala’o husi Asian Development Bank (ADB) iha 2014 katak iha Dili laran de’it, loron ida bele prodús ona lixu to’o tonelada 120.

Bainhira laiha solusaun ne’ebé adekuada, iha tinan 10 mai tan, Nasaun sei hasoru problema boot liután ne’ebé kauza husi lixu. Ho aumentu populasaun iha tinan 10 tuirmai, kuantidade produsaun lixu doméstiku iha nivel nasionál sei atinje tonelada 500, nune’e kompañia iha seriedade hodi hamosu solusaun ne’ebé apropriada ba tratamentu lixu.

Iha lansamentu fatuk dahuluk ba indústria ne’e, Ministru Komérsiu Indústria no Ambiente, Constâncio da Conceição Pinto hatete kompañia nia serbisu sei realiza mehi MKIA ne’ebé iha determinasaun atu hamenus plástiku iha Timor-Leste ho polítika ida naran ‘Zero Plastics’.

“Zero plastic ne’e lasignifika katak laimporta ka la uza tan plástiku maibé intensaun mak zero lixu plástiku. MCIA hakarak implementa polítika ida ne’e tanba ita haree rasik iha ita-nia rai lixu liuliu botir aqua mamuk sira ne’e iha fatin hotu, iha estrada, iha ita-nia uma hun, tasi-ibun ne’e mesak botir de’it”, Constâncio dehan iha Lesibutak-Maleuna fatin indústria resiklajen plástiku ne’e harii, horisehik.

Hanesan país ki’ik ida, kompromisu ba meiu-ambiente ne’e boot tebes embora hanesan nasaun ne’ebé mak emite gás estufa ki’ikoan liu no ho indústria ne’e, espera iha tinan 2018 sei laharee tan plástiku iha ne’ebé de’it maibé sei rekolla iha indústria resiklajen hodi transforma ba kadeira.

“Tuir Kompañia nia projesaun sei prodús fulan ida kadeira 3088, tinan ida multiplika 3000 ne’e signifika katak prodús ona liu mil 40 kadeira ne’ebé ita tinan-tinan importa mai”.

Ministru katak MKIA kontente servisu hamutuk ho kompañia no sei akompaña husi inísiu to’o bele hamriik mesak no la’ós estabelesimentu indústria de’it maibé kualidade produsaun kadeira sira no sei rekomenda ba Ministru ne’ebé sei mai atubele kontinua halo akompanamentu ba indústria ne’e to’o nia konkretiza no ba indústria sira seluk ne’ebé mak MCIA hamosu .

“Ida ne’e programa ida ne’ebé MCIA halo iha tinan rua nian laran, ita substitui produtu balun ne’ebé mak ita prodús iha ita-nia rai laran, ida mak ne’e, ne’ebé mak konkretizadu ona mak masin, ita esporta masin no sufisiente ba konsumu internu nomós kafé no buat seluk tan mak ita prodús”.

Ministru apela ba ajente seguransa atu tau matan ba indústria ida ne’e, nune’e bele hala’o atividade industriál sein impedimentu ruma tanba investimentu hotu iha rai ida ne’e timoroan hotu fó seguransa tanba ho ida ne’e mak ema bele mai investe.

Atu aumenta kreximentu ekonómiku iha Timor-Leste, tenke fó apoiu ba setór privadu sira no joven sira ne’ebé mak iha espíritu empreendedorizmu, inovativu, dedikasaun no programa ne’ebé di’ak para hahú sira-nia indústria ki’ik ka médiu ne’ebé bele kontribui ba dezenvolvimentu ekonómiku.

Constâncio Pinto afirma inisiativa husi indústria ne’e sei kria empregu iha inísiu instalasaun to’o iha produsaun sei emprega ema na’in-250 no hanesan empregu diretu ne’ebé kompañia rasik fó maibé sei iha empregu indiretu liuliu ba ema sira ne’ebé aban-bainrua sei rekolla plástiku hodi fa’an fali ba kompañia.

“Iha ita-nia rai problema dezempregu sei kontinua aas tanba ita-nia universidade sira tinan-tinan prodús graduadu rihun ba rihun no barak mak agora la’o nanggur hela tanba kampu traballu limitadu tanba investimentu esternu iha ita-nia sei uitoan hela, indústria pequena no média mós sei uitoan hela, tanba ne’e mak ita orgullu tebes haree indústria ne’e sei fó empregu ba ita-nia joven sira”.

Diretór Kompañia Star Product Lda, José Deolindo Ximenes hatete ba funsionamentu empreza nian, ema ne’ebé halibur lixu plástiku de’it, kompañia halo ona akordu ho traballadór sira iha Baukau, Manatutu no Dili hamutuk ema na’in-70 no traballadór ba hafahe plástiku no sortir (ema ne’ebé hafahe lixu) iha 25, ema ne’ebé halo operasaun ba mákina iha na’in-lima, kondutór na’in-rua, no ema  iha terrenu hodi hasai dadus ba plástiku iha na’in-rua mós.

“Ba futuru sé karik sei iha kontinuasaun, ita halo produtu kadeira ne’e no ita sei halo rekrutamentu sei sa’e to’o 250 pessoas, sei latama dala-ida maibé husi faze ba faze nomós kompañia prontu ona atu fó formasaun ba ema formál no informál bele mai hotu atu ita bele transforma ema hotu sai tékniku profisionál”.

Jornalista: Maria Auxiliadora

Editora: Rita Almeida

HUSIK IDA HATÁN