Komemora Loron Invazaun, AMRT sei Lansa Katálogu Rezisténsia

0
29

DILI (TATOLI)-Loron hitu Dezembru, loron istóriku invazaun Indonézia mai Timor hafoin proklamasaun unilaterál independénsia iha 28 Novembru, Arkivu no Muzeu Rezisténsia Timor-Leste (AMRT) sei lansa katálogu ida ho naran TRIL rezisténsia.

“Iha sete Dezembru ita sei lansa no halo abertura ba edifísiu foun. Abertura ba abrigu subterráneu ne´ebé reabilita iha Timor-Leste ita reabilita abrigu sia i ao mesmo tempu ita lansa katálogu ida naran tril rezisténsia,” informa diretór ezekutivu AMRT, Hamar Antoninho Babtista Alves, iha aredór AMRT, horisehik.

Hamar esplika katak katálogu  ne´e sei hamosu broxura ne´ebé atu konvida ita-nia vizitante sira, tantu nasionál namoos internasionál bele ba vizita ita-nia faktu istória ruma ne´ebé konsege prezerva ona iha fatin sira ne´e hotu.

Broxura ne´e la´ós ita tau de´it iha muzeu, ita sei tau iha otél sira, aeroportu internasionál ne´ebé sai hanesan portaun prinsipál mai Timor-Leste namoos ita sei koordena ho ajénsia aviasaun sira ne´e inklui seluk tan atu bele tau mós iha aviaun hodi bele fahe ba ita-nia vizitante sira mai iha Timor-Leste.

“Ne´e hanoin ne´ebé ita hakarak atu konvida nafatin sidadaun sira hotu nia atensaun ba vizita ita-nia espasu istóriku sira,” hateten diretór ezekutivu ne´e.

Tanba ne´e, nia fó hanoin ba diresaun edukativa AMRT nian ne´ebé hola parte mós iha nia lideransa atu koopera nafatin ba parte relevante sira ba iha aprendizajen.

Buka koordena ho Ministériu Edukasaun, koordena ho universidade sira hotu para ita bele la´o hamutuk nafatin hodi halo eventu ne´ebé hanesan iha tempu ne´ebé la hanesan.

Entretantu, iha komemorasaun aniversáriu da-18 konsulta populár 30 Agostu tinan ne´e AMRT ho inisiativa konvida no koopera ho eskola sekundáriu públiku no privada iha kapitál Dili hodi halo konkursu literatura, liuliu konkursu aprezentasaun poezia husi estudante sira.

(Jornalista: Rafy Belo)

(Editór : Manuel Pinto)

 

HUSIK IDA HATÁN