Koligasaun PLP-FRETILIN, Taur-Alkatiri Sei Deside

0
563
Delegasaun husi Fretilin no PLP kulia ho jornalista sira hafoin halo enkontru iha Otel Novu Turizmu. Foto Tatoli/ Julia Chatarina

DILI (TATOLI) –Delegasaun husi Partidu Fretilín no Partidu Libertasaun Popular (PLP) horisehik, Segunda (28/08) realiza enkontru iha Otél Novo Turizmu hodi ko’alia konaba akordu koligasaun. Rezultadu enkontru delegasaun sei informa ba lider Partidu rua hodi hola desizaun.

Adjuntu Sekretáriu Jerál Fretilín, José Reis informa iha enkontru atu update de’it dokumentu ne’ebé partidu rua ne’e troka ba malu iha semana kotuk liu ba.

“Semana kotuk ami troka dokumentu balun atu halo diskusaun no ohin ami tuur hamutuk fali hodi aserta Pontus balun no ami hetan Pontus balun husi enkontru konaba dokumentu ne’e no sei hato’o fali ba lideransa husi Fretilín (Mari Alkatiri) no PLP (Taur Matan Ruak). Sira Nain rua mak sei foti desizaun final,” José Reis ba jornalista sira iha Otél Novo Turizmu, Segunda (28/8).

José Reis fó hanoin katak durante tinan sanulu liu ba esperiénsia hatudu ona mai timoroan hotu katak, presiza governu ida iha unidade tanba la iha unidade susar atu dudu dezenvolvimentu.

Entertantu Fretilín mós sei iha tan enkontru ho KHUNTO, no partidu ne’e hato’o ona apresiasaun ba Fretilín konaba dokumentu ne’ebé entrega ona. Tuir agenda ohin, Tersa (29/8) sei iha enkontru ho KHUNTO, hafoin sei iha enkontru tan ho PLP no KHUNTO hodi halo dokumentu final.

Iha fatin hanesan Vise Prezidente PLP, Fidelis Magalhães hateten PLP hetan konvite husi partidu mais votadu Fretilín hodi bele tuur hamutuk nune’e bele viabiliza koligasaun ida ba oin.

“Ohin nivel ami nian, Dr Mari mai hanesan fó motivasaun ba ami no fahe ideas balun ho ami, nia mai iha ne’e hodi hatudu katak ita tenke tuur hamutuk, laiha ajenda para lider husi partidu rua atu tuur hamutuk, ohin ne’e husi delegasaun deit,” Fidelis tenik.

Portavoz PLP ne’e haktuir, enkontru ne’e iha hanoin no konkorda ba pontus barak maibé pontus sira ne’e sei tranzmite fali ba lideransa partidu rua hafoin sira halo apresiasaun no fó sai ba públiku.

Antes ne’e lider partidu Fretilín, Mari Alkatiri garante katak antes 5 Setembru, iha ona akordu entre Fretilín ho partidu seluk hodi  harii governu foun.

Nia mós reálsá, Fretilín lakohi ukun hodi kontra partidu seluk, tanba ne’e Fretilín hakarak ukun ho koligasaun, inkluzaun no insidénsia parlamentár.

(Jornalista: Julia Chatarina)

(Editór : Manuel Pinto)

HUSIK IDA HATÁN