KI Sei Tau Atensaun ba Karteira Profesionál

0
36
Prezidente KI ho ninia membru sira halo sosializasaun ba jornalista no midia nain sira iha salaun Obras Publikas Kaikoli, ohin.

DILI, (TATOLI) – Konsellu Imprensa (KI) sei tau atensaun no mekanismu oinsá atu haree karteira profesionál ba jornalista sira, nune’e tinan uluk sei atribui de’it ba sira ne’ebé hetan rekomendasaun.

“KI tau atensaun tebes ba mekanismu atribui kartaun profesionál, tinan uluk sei atribui de’it ba sira ne’ebé hetan rekomendasaun”, hatete Prezidente KI, Virgilio Guterres iha salaun Obras Públikas Kaikoli, ohin.

Nia informa, KI aprova ona dezeñu karteira profesionál. “Ami sei esforsu atu hola makina imprime kartaun nia rasik atu garante ema ruma labele halo duplikasaun”.

Bainhira hetan karteira profesionál bele garante ona kualidade informasaun. Iha lei mos hatete fó injensaun ba maluk sira ne’ebé mak hala’o ona kna’ar jornalista liu tinan lima.

Sira ne’e submete deklarasaun hosi órgaun komunikasaun sosiál atu justifika. Maibé ida ne’e ba jornalista sira ne’ebé servisu permanente iha mídia ida durante tinan lima resin.

Ba jornalista sira iha Radiu Televisaun Timor-Leste (RTTL) presiza iha deklarasaun katak sira prontu submete ba kodegu étika no prontu simu desizaun ruma hosi KI kuandu halo violasaun.

Alende ne’e, KI mos halo sosializasaun kona-ba regulamentu ba direitu resposta. Okaziaun ne’e, Prezidente KI husu atu públiku bele reklama ba mídia sira bainhira sente afeitadu ba publikasaun ruma hosi mídia.

“Sidadaun sira iha direitu atu reklama bainhira mídia públika nutísia ruma la tuir faktu”, hatutan.

KI mos halo sosializasaun ba mídia nain hodi husu halo rejistu administrativu ba KI nune’e asegura katak bainhira iha sidadaun ruma reklama, KI iha koñesementu atu ajuda mídia hetan konfiansa hosi públiku.

Sosializasaun ne’e hetan mos partisipasaun hosi provedor direitu úmanu no justisa, Silveiro Pinto.

Ekipa Redasaun

HUSIK IDA HATÁN