KI Kontinua Hala’o Sosializasaun

0
29
Konsellu Imprensa (KI) realiza sosializasaun lei komunikasaun sosiál no regulamentu ne'ebe KI aprova ona. Atividade ne'e hala'o iha salaun Obras Publikas Kaikoli, ohin. Foto Tatoli/Julia Chatarina

DILI, (TATOLI) – Konsellu Imprensa (KI), ohin, realiza sosializasaun ba mídia nain no jornalista sira kona-ba lei komunikasaun sosiál no regulamentu sira ne’ebé aprova ona husi KI no públika ona iha Jornál Repúblika.

Prezidente KI, Virgílio Guterres iha ninian intervensaun hateten hafoin konsulta no aprova lei liuhosi enkontru no dokumentu sira konaba regulamentu, KI tenke hamosu ona, agora iha faze implementasaun husi regulamentu hirak ne’e.

“Ohin ita hahú prosesu atu fó hatene oinsá mekanizmu regulamentu hirak ne’e atu halo no prosedimentu ne’ebé mak tenke la’o ba mídia nain no jornalista sira”, tenik iha ninian intervensaun iha salaun Obras Públikas, Kaikoli.

Nia esplika, ba mídia nain sira kestaun ne’ebé sei implika mak rejistu ba órgaun komunikasaun sosiál, ida ne’e la’os kompozisaun legál maibé nesesáriu administrativu.

Hodi akresenta tan, regulamentu konaba keixa sei esplika oinsá prosedimentu atu hato’o keixa ba jornalista no mídia nain sira, karik iha públiku atu hato’o sira nia keixa prosedimentu hanusa no involve mós elementu sira seluk hanesan implementasaun ka ezersisiu direitu resposta.

Haktuir iha lei númeru 5/2014 loron 19 novembru, KI enkuadra-án ona iha órgaun komunikasaun sosiál nian, nia iha kompeténsia atu halo arbitrajen no mediasaun ba litíjiu sira ne’ebé mosu husi atividade jornalístiku, iha relasaun ho sidadaun, organizasaun, órgaun Estadu no órgaun komunikasaun sosiál sira.

Nune’e mós dekretu lei númeru 25/2015 loron 5 agostu, intrepreta prosesu mediasaun, hodi hatudu katak bele aplika ba litíjiu sira ne’ebé husi hala’o atividade jornalístiku, iha relasaun entre sidadaun, órgaun Estadu no órgaun komunikasaun sosiál ne’ebé mai husi hahalok bele mosu hanesan violasaun lei komunikasaun sosiál, kódiku étika jornalistika norma jurídika seluk iha área komunikasaun sosiál ne’ebé nia supervizasaun sai kompeténsia KI.

Jornalista: Julia Chatarina

Editora: Rita Almeida

HUSIK IDA HATÁN