Kazu Tequinomata La’ós Entre Partidu

1
104
Komandante Jerál Polísia Nasionál Timor-Leste (PNTL), Komisáriu Júlio da Costa Hornay hatan jornalista sira hafoin enkontru ho Xefe Estadu iha Palásiu Prezidensiál Nicolau Lobato Bairo Pite, ohin. Foto Tatoli/Xisto Freitas

DILI, (TATOLI) – Komandante Jerál Polísia Nasionál Timor-Leste (PNTL), Komisáriu Júlio da Costa Hornay hateten kazu hamate ema na’in ida iha suku Tequinomata, postu administrativu Laga, munisípiu Baucau iha loron 31 jullu liu-ba la’ós entre apoiante partidu ho partidu no arte marsiais maibé entre estudante ho estudante.

“Kazu ne’e la’ós entre partidu maibé entre juventude estudante sira iha eskola sekundáriu ida iha Tequinomata ne’ebé hahú ho deskuti malu no ikus tuda malu to’o na’in rua kanek. Kanek na’in rua ne’e ida la konsege salva vida hafoin evakua ba Ospitál Baucau”, haktuir Júlio Hornay ba jornalista sira iha Palásiu Prezidenti Nicolau Lobato, Bairu-Pité, kuarta ne’e, hafoin levanta kazu refere ba Xefe Estadu, Francisco Guterres Lú Olo.

Nia informa durante kampaña to’o eleisaun laiha violénsia entre elementu partidu sira, maibé liu tiha eventu demokrátiku maka dehan akontese problema entre militante partidu ne’e laiha lójika.

Hafoin problema ne’e akontese, Hornay tenik, polísia hamutuk ho Polísia Militár halo halo kedas intervensaun ba área ne’ebá no to’o ohin loron situasaun iha ne’ebá kontroladu.

“Ami orienta ona Komando Polísia Munisípiu Baucau atu koordena ho parte autoridade suku sira nomós família vítima no suspeitu para túr hamutuk oinsá rezolve problema ida ne’e, maibé prosesu krime la’o nafatin,” nia haklaken.

Orsida lorokraik, Komandante Jerál PNTL afirma, sei hala’o prosesu funerál ba vítima hosi akontesementu ne’e.

PNTL konsege kaptura ema na’in ne’ebé involve iha problema ne’e no oras ne’e suspeitu hirak refere polísia detein ona iha sela Komando Polísia Baucau.

Jornalista: Xisto Freitas

Editora: Rita Almeida

1 COMMENT

  1. Husu ba Parte Seguransa (OPS) hamutuk lider local Suco refere halo investigasaun nebe klean atu nune bele hatene problema nia hun, razaun tamba problema nebe mak akontese iha suco Tequinomata laos foin akontese maibe kuaze tinan ida ho balun ona no comunidade tequinomata rasik balun avkua ba suco seluk.
    Obrigado

HUSIK IDA HATÁN