Karta Petisaun MUTL Sei Entrega ba Meja Foun PN

0
409
Prezidente Parlamentu Nasionál (PN), Adérito Hugo da Costa.

DILI, (TATOLI) – Prezidente Parlamentu Nasionál (PN), Adérito Hugo da Costa hatete karta petisaun husi Movimentu Estudante Universitáriu Timor-Leste (MUTL) sei entrega ba meza foun lejislatura da-haat nian tanba daudaun ne’e laiha ona plenária.

Nia dehan, sei halo koordenasaun ho lejislatura da-haat oinsá atu buka solusaun ba asuntu ida ne’e tanba Prezidente PN labele halo desizaun mesak maibé tenke liuhusi desizaun koletivu konsellu administrasaun nian.

“Prezidente Parlamentu labele halo desizaun mesak até lei orgánika lafó ba Prezidente atu halo buat ida mesak, tenke husi desizaun konsellu hotu tanba sira mak iha diretu votu. Diretu votu ne’e husi membru konsellu administrasaun sira, entaun ida ne’e mak ami haree hela”, Adérito hatete iha PN, ohin.

Aleinde ne’e, kestaun seluk mak plenária hala’o ona iha última segunda foin lalais ne’e no laiha tan atividade ida atu halo ba deliberasaun ninian ba asuntu sira ne’ebé urjente tanba laiha ona plenária.

“Tan ne’e mak ami rejista hela opiniaun sira ne’e para depois bele entrega ba iha kontinuasaun Kuarta Lejislatura ninia meza foun. Ohin líder bankada sira fó atensaun ba ida ne’e, presiza tebes opiniaun públika ninian movimentu ne’ebé halo atensaun ba desizaun ne’ebé tomada ona, líder bankada hotu rona ida ne’e maibé nafatin de’it mekanizmu internál ne’e mak gia Parlamentu Nasionál ne’e toma desizaun”.

Iha karta petisaun ne’e husu atu PN halo alterasaun ba rezolusaun parlamentu nian sobre leilaun karreta maibé atu halo mudansa ne’e tenke iha deliberasaun ruma iha plenária maibé daudaun ne’e laiha ona.

“Entaun ami konsidera de’it opiniaun sira ne’e hotu depois rekomenda ba meza foun ne’ebé ita hein katak semana oin bele iha ona meja foun ho konsellu administrasaun foun, tanba toma desizaun ne’e la’ós iha Unipessoal lahanesan ho parte ezekutivu nian, ida ne’e mak situasaun ne’ebé mak ami enfrenta. Ami hala’o hela koordenasaun oinsá buka solusaun ba asuntu ida ne’e”.

Tanba mandatu hotu ona PN labele halo ona desizaun iha últimu mandatu semana ne’e. “Ita-boot sira hatene kalendáriu mandatu nia mós muda, III Lejislatura tuir loloos hotu iha 30 jullu kuandu ita-nia síklu tinan lima la’o ho loloos mas tanba tinan ne’e muda entaun mandatu ida ne’e estende to’o ohin, tan ne’e buat hotu traballu uma nian no asuntu pendente em termu administrativa no lejislasaun nian ne’e ita sei kontinua ba iha IV lejislatura”.

Iha rezultadu eleisaun parlamentár nian hatudu bankada tolu kontinua asentu iha PN iha lejislatura da-haat mak CNRT, FRETILIN no PD menus de’it mak Frente-Mudansa ho kadeira rua no mosu tan partidu rua mak PLP no KHUNTO, nune’e bele toma desizaun ba ezijénsia estudante universitáriu sira-nia karta petisaun.

Jornalista: Maria Auxiliadora

Editora: Rita Almeida

Notísia ne’ebé relevante : 

MUTL Hato’o Petisaun ba Órgaun Soberanu

HUSIK IDA HATÁN