João Paulo: Ha’u Sei Serbisu ho Responsabilidade

0
289
Konselleiru João Paulo Lorenço foto hamutuk hafoin simu pose. Foto Tatoli: António Gonçalves

DILI, (TATOLI) – Konsellu Impresa (KI), ohin, fó pose ba João Paulo Elio Lorenço da Costa hodi asume kna’ar nu’udar konselleiru iha Konsellu Fiskál Uníku KI nian iha Palásiu Governu.

João Paulo iha nia intervensaun hateten sei hala’o no asume konfiansa ne’e ho responsabilidade.

Ho rekursu ne’ebé limitadu, nia sei halo esforsu nafatin atu hadi’a liutan jestaun. “Ha’u konkorda tebes liafuan iha termu  referénsia ba kna’ar ida ne’e katak presiza servisu ho onestidade no akuntável, serbisu ho responsável no transparánsia”, tenik.

Nia dehan sei esforsu tau aas interese Nasaun no buka fó apoiu másimu ba programa governu nian.

Eventu ne’e hanesan esforsu governu nian liuhusi SEKOMS (Sekretáriu Estadu Komunikasaun Sosiál) ba hamosu  governasaun di’ak.

Tomada pose ba pontu xave ne’e ho objetivu atu institunaliza polítika ne’ebé mak di’ak iha instituisaun otonomia hanesan KI.

Nia husu atu serbisu hamutuk liuhosi komunikasaun ne’ebé mak di’ak iha KI nia laran nomós kontinua manten nafatin komunikasaun ne’ebé mak di’ak ho SEKOMS.

“Ha’u-nia serbisu sei laiha sentidu, sei la la’o, se la iha apoiu”, katak tan.

Prezidente KI, Virgílio da Silva Guterres akresenta prezensa konselleiru ne’e kompleta ona estrutura KI nian tuir lei ne’ebé mak haruka hodi kontribui ba andamentu.

“Liliu iha área ezekusaun orsamentu, nune’e garante ezekusaun orsamentu tuir liña, regra orsamentu estadu nian, garante akuntabilidade no transparánsia husi estadu nian ba povu”, dehan prezidente KI ne’e.

Prezidente KI hein katak regra, prinsípiu no lei sira ne’ebé regula konsellu nia serbisu sei sai hanesan matadalan.

“Nune’e objetivu serbisu nian nomós konselleiru sira no diresaun sira bele mós koopera di’ak liutan hodi garante ezekusaun ne’ebé transparante no responsável iha Konsellu Imprensa”, hakotu.

Sekretáriu Estadu Komunikasaun Sosiál, Nelio Isaac Sarmento saúda no kongratula hodi espera prezensa konselleiru ne’e bele garante liutan transparánsia no akuntabilidade iha KI.

Serimónia ne’e partisipa hosi Prezidente Komisaun Funsaun Públika (KFP), Faustino Cardoso, Diretór Jerál Prezidensia Konsellu Ministru.

Emposadu hetan juramentu liuhusi padre Urbanus Bunga Lolon no asiste diretamente husi Prezidente Komisaun Funsaun Públika, Diretór Jerál Prezidensia Konsellu Ministru, SEKOMS, diretór relevante inklui família husi empozadu rasik.

Jornalista: Rafy Belo

Editora: Rita Almeida

HUSIK IDA HATÁN