Hato’o Aspirasaun Yes Anarkizmu No

0
548
Ministru Interior (MI), Longuinhos Monteiro.

DILI (TATOLI)—Ministru Interiór, Longuinhos Monteiro apela ba manifestante no estudante sira katak atu hato’o krítika, aspirasaun ka pensamentu tuir nia dalan, maibé labele iha anarkizmu.

“Terseira parte bele infiltra, bele aproveita. Tenke kuidadu ho buat sira ne’e,” Ministru Longuinhos Monteiro apela ba manifestante no estudante sira iha, iha Parlamentu Nasionál (PN) oin, Díli, ohin.

Nia sujere, labele iha “harahun”, no labele uza liafuan ne’e. Ida ne’e tenke hapara bainhira Akontese, polísia iha meius atu hapara.

Eis-prokuradór jerál repúblika ne’e mós aprezenta katak bele halo manifestasaun maibé tenke iha dixiplina.

Bainhira iha dixiplina demo bele to’o semana ida, fulan ida ka liu bele de’it importante mak labele iha “harahun” ka anarkizmu tan estudante mós sidadaun Timor-Leste nian.

Enkuantu demo mak harahun fali misaun polísia nian mak hapara anarkizmu namoos importante asegura ema no estadu nia sasán ka patrimóniu.

“Labele iha anarkizmu, ida ne’e de’it,” nia apela tan.

Husu mós ba populasaun sira iha Dili laran atu hakmatek no lalika tama iha kestaun protesta no manifesta ita-nia intensaun ho maneira oioin maibé importante mak labele iha anarkizmu.

“Ajuda kontribui ba! Hato’o mensajen ne’ebé pozitivu,” nia sujere ba profisionál órgaun komunikasaun sosiál, tantu imprensa, elektróniku no online.

Entretantu estudante no manifestante sira ne’ebé halibur iha MUTL (Movimentu Universitáriu Timor-Leste) halo manifestasaun relasiona ho rezolusaun Parlamentu Nasionál (PN) hodi leilaun karreta Prado tan konsidera la tuir prosedimentu ne’ebé prevee ona iha dekretu lei 32/2011 kona-ba jestaun no alienasaun ba patrimóniu movel estadu nian. 

(Jornalista: Rafy Belo)

(Editór : Manuel Pinto)

HUSIK IDA HATÁN