Governu TL-Japaun Lansa Projetu Re-alokasaun Terminál Ró

0
218
Xefe Governu, Rui Maria de Araújo akompaña hosi Vise Ministru daruak MOPTK, Inâcio Moreira iha serimónia lansamentu fatuk dahuluk ba kontrusaun terminál ró iha portu Dili, ohin. Foto GPM

DILI, (TATOLI) – Governu Timor-Leste liuhosi Ministériu Obras Publikás Transporte no Komunikasaun (MOPTK) hamutuk ho governu Japaun liuhosi ninia reprejentante embaixadór, tau fatuk dahuluk ba projetu re-alokasaun ba terminál ró iha Portu Dili, ohin.

Fonte ba fundu projetu ne’e hosi governu Japaun ho montante orsamentu ¥2.197 (maizumenus milliaun dolar amerikanu 20).

Servisu konstrusaun sei ka’er hosi Tobishima Corporation ho supervizaun hosi Ides Inc ho Japan Port Consultants Ltd. Terminál ne’e sei harii ho naruk maizumenus metru 100 ho luan metru 20 ne’ebé bele akomoda ró rua durante oras 24 nia laran.

Plataforma ho rai ne’ebé bele muda ba mai ho medida 55m x 52m. Fasilidade ne’ebé presiza mak sistema eletrisidade no bee mós, hamate ahi nomós ekipamentu seguransa.

Projetu ne’e sei kompleta iha fulan-marsu 2019.

Primeiru Ministru, Rui Maria de Araújo iha ninia diskursu hatete, mesmu governu troka malu maibé prosesu dezenvolvimentu ne’e tenke kontinua. Tanba ne’e, Planu Estratéjiku Dezenvolvimentu Nasionál (PEDN) nu’udar mata-dalan ba prosesu konstrusaun Estadu, liliu iha área infraestrutura.

“Tinan oin kuandu hotu, governu foun mai mak inagura, ida ne’ebé benefisiu mak povu”, hatutan Xefe Governu. “Tanba ne’e, prosesu dezenvolvimentu hotu kontinua, iha ninia hun no rohan”.

Momentu ne’e, Xefe Governu agradese ba funsionariu tomak, dirijente, tékniku no asesór sira. Nune’e mós agradese ba povu, governu, institusoen no empreza públika Japaun.

Biban ne’e, embaixadór Japaun ba Timor-Leste, Eiji Yamamoto espera, terminál foun ne’e sei fornese transporte ne’ebé efikas no seguru ba ema nomós sasan hodi dezenvolve Nasaun ne’e iha área turizmu no industria.

Nune’e mós, Vise Ministru daruak MOPTK, Inâcio Moreira hatete, terminál pasajeiru sei kompostu klase ekonomia, VIP (Very Important Person) no fatin ba defisiente no labarik sira. Nune’e mós prepara ba fatin estasiomentu ba kareta sira ne’ebé tula pasajeiru.

Rehabilitasaun ba terminál pasajeiru ne’e ho andar ida no akomoda ema 300. Alende fundu hosi governu Japaun, projetu ne’e hetan mós fundu hosi governu maizumenus milliaun ida dolár amerikanu.

Jornalista: Rita Almeida

HUSIK IDA HATÁN