Governu Timor-Leste Hato’o Mensajen Solidaridade Ba España

0
61
Kareta Van ida ho velosidade as, xoke turista sira ne'ebe lao ain iha Barcelona no Cambrils. Foto: BBC

DILI, (TATOLI) – Governu Timor-Leste hato’o mensajen solidaridade ba Govenu no povu España hafoin akontesimentu trájiku iha Barcelona no Cambrils ne’ebé halo ema nain 13 mate no 100 resin kanek.

Liuhosi portal ofisiál governu, Primeiru Ministru (PM) Rui Maria de Araújo hateten Timor-Leste nia fuan sempre hamutuk ho populasaun España no nasaun seluk ne’ebé sai vítima.

“Ami nia fuan hamutuk ho populasaun España no ho sira seluk ne’ebé maihusi nasaun seluk  ne’ebé sai vítima iha atake terivel ida ne’e”, tenik.

Governu Timor-Leste aprezenta ninia laran triste ba família no maluk sira ne’ebé mak ninia moris afetadu lahó dalan justisa no haruka mensajen ida ba Liurai España, Filipe VI no ba PM España, Mariano Rajoy hodi hatudu katak Governu mós sente orór no sente triste ho akontesimentu boot  ida ne’e.

Nune’e Governu mós hato’o liafuan rekoñesimentu ida no hahii ba serbisu ne’ebé halo ona husi elementu intervensaun husi komunidade autónoma Kataluña no husi forsa seguransa española nian iha situasaun ne’ebé halo terus no perturba tebetebes ida ne’e.

Iha loron Kinta (17/8), insidente terrorista akontese iha Barcelona hafoin iha loron sesta (18/8) akontense tan insidente hanesan iha sidade Cambrils.

Insidente ne’e akontese ho métodu atake husi terrorista ne’ebé xoke turrista sira ne’ebé la’o ain.

Jornalista: Julia Chatarina

Editora: Rita Almeida

HUSIK IDA HATÁN