Governu Lansa Rezultadu Sondajen

0
260
Primeiru-ministru, Rui Maria de Araújo ho Prezidente Komisaun Funsaun Públika (KFP), Faustino Cardoso foto hamutuk ho diretór jerál sira, peskizadór no analizadór sira. Foto: GPM

DILI, (TATOLI) – Xefe Sestu Governu Konstitusionál, Rui Maria de Araújo akompañadu ho Prezidente Komisaun Funsaun Públika (KFP), Faustino Cardoso Gomes lansa rezultadu sondajen: “Persesaun Públiku ba Funsaun Públika iha Timor-Leste”.

Primeiru-ministru, Rui Maria de Araújo iha nia intervensaun hateten, importánsia husi rezultadu sondajen ida ne’e ba dirijente administrasaun públika sira nian kona-ba saida de’it. La’ós satisfeitu ka la satisfeitu ho rezultadu ne’e.

Iha implikasaun boot rua, oinsa refleta fila fali polítika ne’ebé mak define ona no refleta fila fali ba prosesu implementasaun polítika.

“Ho baze ba méritu, kualidade husi servisu ida ne’e, importante ba Komisaun Funsaun Públika atu serbisu hamutuk ho ministériu sira hotu ho setór sira ne’ebé envolvidu direta liu ba prestaun servisu ba públiku”, hateten primeiru-ministru iha MNEK (Ministériu Negósiu Estranjeiru no Kooperasaun), Praia dos Coqueiros, ohin.

Dirijente administrasaun públika sira iha responsabilidade atu aprezenta faktu sira ne’e ba polítiku sira. Faktu sira ne’e depois orienta polítiku sira hodi polítika sira tuir mai. “Ida ne’e importante ba polítiku sira”, akresenta.

Esperiénsia, demokrasia ne’ebé sei nurak, prosesu konstrusaun estadu no nasaun sei nurak polítiku sira “dalabarak” halo polítiku la haree ba dadus. Ne’e risku.

Rezultadu husi sondajen ida ne’e refletidu iha rezultadu eleisaun tanba dadus ne’e halo iha juñu, eleisaun la’o iha jullu. Foti rezultadu eleisaun halo komparasaun ho rezultadu insatisfasaun ne’ebé mak iha, halo konkluzaun rasik.

“Ami polítiku presiza sensível ba ida ne’e,” nia reforsa. Tanba ne’e, ida, nia apela ba prezidente komisaun funsaun públika, dirijente administrasaun públika katak ekipa téknika tenke estrai dadus ho rezultadu pur setór.

Presiza halo workshop iha setór sira ne’e, atu nune’e tékniku sira entende didi’ak prestasaun públiku nian kona-ba serbisu ne’ebé halo.

Segundu, rezultadu husi dokumentasaun pur setór presiza aprezenta ba membru governu sira ne’ebé mak mai, iha sétimu governu konstitusionál hanesan faktu, evidénsia atu bele hanoin kona-ba polítika sira ne’ebé presiza define mai oin ka oinsa hadi’a di’ak liutan prosesu jestaun iha instituisaun.

Terseiru, ba KFP no nia dirijente sira hodi hanoin kona-ba sondajen regulár tanba presiza define polítika, presiza halo revizaun ba polítika sira ne’ebé iha tiha ona no presiza revé métodu implementasaun husi polítika sira ho baze ba evidénsia.

“Prinsípiu importante iha administrasaun públika liliu iha dezenvolvimentu polítika públika mak dezenvolvimentu polítika iha baze faktus,” esplika xefe governu ne’e.

Prezidente KFP, Faustino Cardoso Gomes garante katak ho sondajen ne’e, iha rezultadu kredivel tebes tanba tuir dezenvolvimentu akadémiku nian no liuhusi prosesu análize ne’ebé rigorozu tebes, uza programa software ne’ebé avansadu hanesan GPS, SPSS, KoBo ToolboX no seluk tan.

Sondajen ne’e la’ós atu sukat no hatene públiku nia persepsaun ba servidór estadu nia dezempeñu maibé importante liu mak hatene to’o iha ne’ebé órgaun públiku no alkansu no oinsa koñesimentu no esperiénsia públiku nian ba programa, servisu no atendimentu sira ne’ebé la’o hela iha baze.

Atu bele sai indikadór dezempeñu iha planu hodi bele hadi’a ita-nia atendimentu ba públiku di’ak liutan iha tempu oin mai. Funsionáriu públiku kontinua hala’o kna’ar hanesan babain mezmu ho orientasaun foun mai.

“Konvida ita hotu atu fó komprímisu ba iha implementasaun rezultadu sondajen ne’e iha governu foun mai” nia apela.

Entretantu, peskiza no analíze ne’e hala’o ho maneira sientífika bazea ba padraun importante rua hanesan koñesimentu no esperiénsia kona-ba servisu sira ne’e hetan husi funsionáriu públiku no públiku sira.

Nune’e mós sondajen ne’e seidauk halo análize detalladu kona-ba asosiasaun entre persesaun públiku nian liliu satisfasaun no insatisfasaun tanba ne’e presiza halo nafatin hodi kompleta di’ak liutan hodi buka hatene loloos.

Peskiza ne’e hala’o husi KFP, parseria ho organizaun lokál ho naran INSIGHT ne’ebé iha esperiénsia kle’ur no koñesimentu kle’an ba sondajen sientífiku ho fundu rihun 79,5$ ho fundu Ministériu Finansa husi Fundu Dotasaun Governu.

Peskiza ne’e hala’o iha munisípiu 13 iha teritóriu Timor-Leste ho totál amostra ema na’in 1.200.

Jornalista: Rafy Belo

Editora: Rita Almeida

HUSIK IDA HATÁN