Governu Introduz Ona Dezentralizasaun Orsamentál

0
134
Vise Ministru, Helder Lopes nia intervensaun iha ámbitu enkontru ho dirijente administrasaun públika ne’ebé organiza hosi Komisaun Funsaun Públika (KFP) iha Ministériu Finansa, Aitarak laran, Kuarta (2/8). Foto TATOLI/ Antonio Goncalves

DILI, (TATOLI) – Mandatu VI Governu Konstitusionál liuhosi Ministériu Finansa hahú introduz ona polítika dezentralizasaun orsamentál ba munisípiu hotu atu ida-idak bele jere iha nia área.

“Orsamentu mandatu VI Governu Konstitusionál, polítika balun ne’ebé ita introduz liuliu dezentralizasaun orsamentál munisípiu nian no instituisaun Estadu ne’ebé tuir sira nia lei orgánika ho autonómia finanseira, adminsitrasaun no patrimoniál”, hateten Vise Ministru Finansa, Hélder Lopes nia intervensaun iha ámbitu enkontru ho dirijente administrasaun públika ne’ebé organiza hosi Komisaun Funsaun Públika (KFP) iha Ministériu Finansa, Aitarak laran, Kuarta (2/8).

Nia haktuir, kuandu polítika dezentralizasaun orsamentál implementa, ema hahú duvida katak ita nia ema seidauk preparadu no bele promove fali buat ne’ebé ema la hakarak, maibé orientasaun Primeiru Ministru, Rui Maria de Araújo halo ita konsege dezentraliza no monitoriza liuhosi sistema, hatudu katak instituisaun balun halai lalais, balun ladun halai no balun dudu mak halai.

Polítika dezentralizasaun orsamentál tenke implementa, kuandu la’e eh tauk demais signifika ita nunka la’o ba oin, ho nun’e Ministériu Finansa apresia tebes ba kooperasaun hosi dirijente administrasaun públika tanba servisu hamutuk ho koordenasaun di’ak bele halo susesu ba implementasaun polítika ne’e to’o agora.

“Uluk ita boot sira dehan buat hotu dezentraliza iha Ministériu Finansa maibé hahú hosi 2017 servisu ne’ebé sentralizadu bele dezentraliza ona orsamentu ba ministériu sira”, haktuir nia.

Enkuantu, Ministériu Finansa nia papél iha termu polítika fiskál haree ba reseita no despeza maibé kuandu hala’o servisu finansa labele la’o mesak maibé tenke alkansa ho dirijente administrasaun públika.

“Ita servisu hamutuk bele halo buat lubuk ida no buat balun ne’ebé presiza kontinua halo no hadi’ak di’ak liu tan jestaun finansa públika iha Timor-Leste di’ak liu tan”, akresenta tan.

Entretantu, governu foun ne’ebé mai presiza prepara orsamentu rua mak orsamentu ratifikativu atu bele aguenta servisu administrasaun públiku 2017 to’o remata, nune’e, Ministériu Finansa teknikamente prepara ona kalendáriu no matéria maibé presiza nafatin kolaborasaun hosi dirijente sira atu orsamentu ratifikativu ita bele halo ho orientasaun polítika ne’ebé governu foun sei mai.

Hatutan tan, tuir kalendáriu Ministériu Finansa prepara Orsamentu Jerál Estadu 2018 atu kolabora bafatin hosi téknika ministériu nian liuhosi orientasaun polítika hosi goevernu foun atu makina estadu bele kontinua funsiona tuir orsamentu ne’ebé prepara.

Jornalista: Zezito Silva

Editora: Rita Almeida

HUSIK IDA HATÁN