Governu Foun Tenke ho Nasionalizmu ba Transparánsia

0
115
Logo Luta Hamutuk

DILI, (TATOLI) – VII Governu Konstitusionál ba periodu 2017 to’o 2022 tenke iha nasionalizmu no patriotizmu hodi halo transparánsia no akuntabilidade kona-ba implementasaun programa infraestrutura iha Timor laran tomak.

“Governu foun ne’ebé mai tenke iha sentidu nasionalizmu no patriotizmu ba implementasaun projetu infraestrutura nia transparánsia no akuntabilidade tanba realmente sosiedade sivíl sira monitoriza projetu estrada Hudi Laran hatudu obra ne’e la klaru no se mak halo, tanba laiha kuadru informasaun ne’ebé destakadu”, hateten Diretór Luta Hamutuk, José Alves da Costa ba ajénsia TATOLI iha semináriu nasionál ne’ebé organiza hosi Forum Organizasaun Naun Govermentál iha Ótel Ramelau, ohin.

Nia afirma, transparánsia no akuntabilidade ba implementasaun projetu tenke klaru, hanesan iha tinan ida obra hira mak implementa, atu ezekuta iha ne’ebé, se mak atu implementa, oinsá ho prosesu implementasaun no kompaña ne’ebé mak ezekuta.

“Ami sente triste tanba liuhosi monitorizasaun hosi ekipa Luta Hamutuk hala’o durante ne’e hakarak promove transparánsia, akuntabilidade no etika atu labele iha korupsaun maibé realidade ministériu sira ladun nakloke ba sosiedade sivíl sira”, haktuir.

Hatutan tan, Luta Hamutuk tau matan ba projetu infraestrutura bázika hanesan bee moos, eletrisidade, estrada, ponte, irigasaun no infraestrutura saúde nian.

“Ami halo monitorizasaun maibé hasoru dezafiu barak hanesan susar atu asesu ba dadus, ami konfuzaun maske halo karta barak no aprosima ba ministériu sira maibé sira ladun simu pedidu kuandu atu asesu dadus”, akresenta.

Monitorizasaun Luta Hamutuk nian konsege rezolve problema neen ou hitu hanesan projetu balun abandona, halo aprosimasaun ho entidade sira no konsege atende hodi povu to’o hetan rezultadu.

Projetu balun laiha kualidade, ninia parte konsege koa’lia atu asegura no konsege la’o di’ak, obra balun ne’ebé ema husik no la’o lakon tiha maibé konsege buka tuir hodi aprosima no sira konsege fila mai hodi kontinua servisu.

Luta Hamutuk eziste hanesan parseiru ba entidade governante sira, setór privadu atu oinsá bele servisu hamutuk hodi promove transparánsia no akuntabilidade iha prosesu dezenvolvimentu nasionál atu povu bele sente ninia benefisiu.

“Ami haree maioria projetu hanesan siluman (invisível-term portugés), tanba dala balun obra ne’e mai hosi ne’ebé mós ema lahatene, se mak halo mós ema lahatene, hotu-hotu mai dehan hodi ida ne’e nia naran mak implementa no hodi ninia naran mak hetan projetu”, haktuir tan.

Jornalista: Zezito Silva

Editora: Rita Almeida

HUSIK IDA HATÁN