Gabinete PM Fasilita Komputadór 249 Ba Programa Sistema Dijitalizasaun

0
57
Primeiru Ministru akompaña hosi Vise Ministra Saúde no embaixadór Japaun mai Timor-Leste, haree sistema informasaun no komunikasaun bainhira inagura edifisiu foun sala emerjénsia Hospitál Nasionál Guido Valadares Dili. Foto GPM

DILI, (TATOLI) – Governu Konstitusionál Da-neen liuhosi Gabinete Primeiru Ministru fasilita komputadór hamutuk 249 ba programa saúde na família atu apoiu sistema dijitalizasaun.

“Ha’u apresia tebes ba polítika Xefe Governu, Rui Maria de Araújo ba workshop E Health ne’ebé hasa’e kobertura saúde universál hosi teknolojia informasaun no komunikasaun”, apresia Vise Ministra Saúde, Ana Isabel Soares iha ninia intervensaun ba atividade workshop kona-ba inovasaun kobertura saúde universál iha Timor-Leste liuhosi teknolojia informasaun no komunikasaun atu introduz liu tan sira ne’ebé ladauk utiliza sistema dijitalizasaun.

Iha salaun ministériu saúde Kaikoli, ohin, nia husu ba diretór saúde munisípiu, diretór saúde ospitál no diretór sira hosi fasilidade saúde hotu atu estabelese prestaun saúde ho profesionál liuhosi komputadór hirak ne’e hodi uza ba sistema informasaun no komunikasaun.

“Komputadór hosi Gabinete Primeiru Ministru hamutuk 249 inklui parseiru dezenvolvimentu sira atu ajuda profesionál saúde hodi uza servisu saúde nian, la’os uza fali ba servisu seluk”, afirma.

Timoroan milaun ida resin de’it, nune’e atu halo atendimentu saúde, governu tenke responde uluk ema barak nia hakarak no ita labele responde ema ida-idak nia hakarak hotu.

Prosesu implementasaun programa saúde família atinje ona pursentu 98 hosi dadus família nian no dadus sistema dijitalizasaun atinje ona pursentu 84.

Enkuantu, objetivu sistema dijitalizasaun la’os tama de’it ba sistema laran maibé iha tan kuidadu primária, kuidadu sekundária no tersiaria.

Entretantu, organizasaun saúde mundiál define ona E Health nu’udar teknolojia informasaun no komunikasaun saúde no meiu inovativu ida hodi hadia liña informasaun liu hosi meiu eletróniku atu suporta prestasaun saúde no jestaun ba sistema saúde nian.

Nune’e, Sentru Informasaun Teknolojia fornese benefisiu signifikativu, la’os atu alkansa objetivu saúde de’it maibé atu demostra saida mak alkansa ona no kustu hirak ne’ebé relasionadu ho implementasaun iha terenu.

Objetivu hosi inovasaun E healt mak atu hasa’e saúde universál, lori prestasaun kuidadu saúde ba komunidade no oinsá halo sistema saúde sai efisiente, efetivu liu tan no responsive ba nesesidade komunidade nia espetativa.

Sistema saúde teknolojia informasaun no komunikasaun mak sei uza atu hadia time lines (konveniénsia), kronograma (grafiku eh data) no relatóriu saúde públika ne’ebé loloos no fasilita halo monitorizasaun no vijilansia ba moras.

E health deskreve ona katak nu’udar meiu ida atu asegura informasaun loloos hodi fornese ba ema loloos, iha fatin loloos no tempu loloos no iha garantia ba forma elektrónika atu garante kualidade no efisiénsia prestasaun kuidadu saúde, peskiza, edukasaun no koñesimentu.

Informasaun liuhosi rejistrasaun saúde elektróniku rejistu pasiente no fahe fonte informasaun entre profesionál saúde sira no ba pasiente ne’ebé simu asisténsia iha diagnosa, prevensaun no promosaun tratamentu no referénsia iha nivél kuidadu saúde hotu.

Liuhosi E Health bele fó efisiénsia no prestasaun ba fornesimentu esensiál hanesan aimoruk, medikamentu, vasina,  transferénsia, korente distribuisaun no seluk tan.

Jornalista: Zezito Silva

Editora: Rita Almeida

HUSIK IDA HATÁN