Funsionáriu PCM Agradese ba Dedikasaun Na’i Ulun Haat PCM Nian

0
424
Lembransa ne’ebé funsionáriu PCM fó ba ulun boot PCM nian. Foto/Egas Cristovão.

DILI, (TATOLI) – Funsionáriu tomak Prezidénsia Konsellu Ministru  (PCM-sigla iha portugés) agradese ba na’i-ulun haat PCM nian, Ministru Estadu no Prezidénsia Konsellu Ministru, Agio Pereira, Sekretáriu Estadu Konsellu Ministru, Avelino Maria Coelho, Sekretária Estadu Asuntu Parlamentár, Maria Teresinha Viegas no Sekretáriu Estadu Komunikasaun Sosiál, Nélio Isaac Sarmento ba sira-nia dedikasaun no orientasaun durante tinan sanulu.

Diretór PCM, Victor Maia ho funsionáriu tomak hato’o agradesimentu ba servisu ulun boot na’in-haat PCM nia durante ne’e

“Iha slogan ida katak um por todos, todos por um hanesan lema iha Sestu Governu Konstitusionál hakarak liga ida ne’e ba matenek na’in ida hatete iha polítika, iha administrasaun por tantu laiha polítika sein administrasaun, ida ne’e ami hanesan funsionáriu públiku no ha’u empresta termu ida husi Primeiru-Ministru katak órden burokrátika ho órden polítika, ne’ebé sein burokrasia polítika lala’o”, Victor hatete iha ámbitu serimónia agradesimentu iha salaun PCM, ohin.

Entre rua ne’e konjuga hodi hala’o programa ne’ebé estabelesidu para bele hala’o, nune’e funsionáriu PCM iha ámbitu PCM agradese tebes ba na’i-ulun haat ba sira-nia dedikasaun tomak ho orientasaun polítika ba funsionáriu sira ho kapasidade administrativa bele ezerse polítika ne’e.

“Ami hamutuk ho kargu diresaun xefia, funsionáriu tomak iha Prezidénsia Konsellu Ministru karik ida ne’e hanesan biban ida ne’ebé mak ita tenke aproveita didi’ak, hanesan uma na’in la’ós atu despedida maibé biban ida atubele agradese ba ita-boot sira-nia orientasaun durante tinan 10”.

Seretáriu Estadu Konsellu Ministru, Avelino Maria Coelho mós agradese kooperasaun no disponibilidade durante tinan lima serbisu hamutuk.

Seretáriu Estadu Konsellu Ministru, Avelino Maria Coelho.

“Hanesan baibain dehan ami polítika ne’e mai depois fila, funsionáriu sira komesa husi diretór jerár to’o sira ne’ebé serbisu, dalabarak ita hanoin sira lahalo buat ida, liuliu sira mak kria kondisaun di’ak ba ita serbisu, ne’ebé hodi ha’u-nia naran nomós gabinete tomak hato’o agradesimentu ba funsionáriu tomak, laiha liafuan despedida tanba ita sei hasoru malu iha públiku no fatin sira”.

Sekretáriu Estadu hatutan sira sei husik hela fatin ida ne’e ho kontente no fiar karak esperiénsia ne’ebé funsionáriu sira hetan hamutuk durante tinan lima serbisu hamutuk, ida ne’ebé di’ak rai nafatin, ida ne’ebé halo fuan moras tenke perdua.

Sekretária Estadu Asuntu Parlamentár, Maria Teresinha Viegas hato’o apresu no sinsériu agradesimentu tanba serbisu mak halo hamutuk no serbisu mak sei haketak.

Sekretária Estadu Asuntu Parlamentár, Maria Teresinha Viegas.

“Hakarak hato’o katak serbisu hamutuk ne’ebé mak iha ami aprende barak husi ita-boot sira liuliu ha’u-nia diretór jerál no asesór sira iha ámbitu Prezidénsia Konsellu Ministru nian no ami-nia Ministru Agio Pereira, ami mós hetan instrusaun no orientasaun barak, embora lasai hanesan espetativa ita hotu nian  maibé ha’u tenke rekoñese katak iha rezultadu barak ne’ebé mak ita hetan no komponente hotu ne’ebé halibur hamutuk iha Prezidénsia Konsellu Ministru karik governasaun ne’e la’o di’ak to’o remata tanba papél ita hotu nian tanba estrutura Governu nian korreponde Governu mak Prezidénsia Konsellu Ministru ”.

Maria Teresinha kontinua katak sira na’in-haat ne’e lasees aan husi kargu xefia PCM nomós funsionáriu sira-nia apoiu no pasiénsia tomak ohin loron sira bele hakat ba ona iha rohan mandatu nian.

Sekretáriu Estadu Komunikasaun Sosiál, Nélio Isaac Sarmento agradese ba Ministru Agio ho nia pensamentu polítiku ida ne’e bele halo polítika nasionál ba setór komunikasaun sosiál iha tinan 2010.

Sekretáriu Estadu Komunikasaun Sosiál, Nélio Isaac Sarmento.

“Ha’u-nia obrigasaun bainhira simu knaar hanesan Sekretáriu Estadu atu enkuadra ou interpreta polítika nasionál ne’e ba programa Kintu Governu Konstitusionál nian to’o Sestu Governu. Ba programa hirak ne’e kuaze ministériu ne’e alkansa programa hotu iha setór komunikasaun sosiál”.

Ho pensamentu polítiku Ministru Agio nian, Sekretáriu Estadu koko interpreta ho lembransa ida ne’ebé husik hela ba PCM formatu livru ida ba setór Komunikasaun Sosiál Timor-Leste nian ne’ebé sei lansa iha loron aban, 19 Agostu 2017 ho lian Indonézia mak “Pembangunan Komunikasi kelembangaan” katak oinsá atu dezenvolve komunikasaun institusionál liuliu instituisaun Estadu sira.

Aleinde ne’e Nélio hato’o mós agradesimentu ba funsionáriu tomak ba kontribuisaun hotu tanba buat ne’ebé la’o ona bá oin ne’e la’ós tanba ketak-ketak maibé tuur hamutuk fó ideia iha PCM nian no orientasaun ne’ebé fó bele alkansa hotu.

Jornalista: Maria Auxiliadora

Editora: Rita Almeida

HUSIK IDA HATÁN