Fulan 7 Ema Nain 237,336 Tama-Sai TL

0
757
Diretór Jerál Servisu Migrasaun, Ministériu Interiór, Boavida Ribeiro. Foto/Egas Cristovão.

DILI (TATOLI)—Diretór Jerál Servisu Migrasaun, Ministériu Interiór, Boavida Ribeiro relata, iha tinan 2017 hahú husi loron 1 Janeiru to’o 31 Jullu 2017 Servisu Migrasaun, Ministériu Interiór hatama ona millaun U$2,128,830 ba kofre Estadu husi totál movimentu ema tama no sai hamutuk 237.336. Mane hamutuk 77,207 no feto 402.791, sira ne’e hotu balun turista no balun sidadaun Timoroan rasik.

“Ita hein katak fin tinan ne’e ita bele atinje millaun 3, ne’e mós depende ba númeru movimentu ne’ebé maka iha no depende mós ba iha ita-nia fiskalizasaun no monitorizasaun,” Boavida informa ba TATOLI iha Kaikoli, horisehik.

Fiskalizasaun no monitorizasaun, Ministériu Interiór iha mós akordu ho nasaun Europeia sira, entaun husi sidadaun hirak ne’ebé mak pasaporte membru Uniaun Europea ninian ne’e TL lakobre taxa husi sira-nia entrada primeira 90 dias.

“Sira tama loron 90 ita fó gratuita depois sira hakarak hela tan ida ne’e mak foin ita kobra taxa ba sira,” Boavida esplika.

Husi númeru movimentu ne’ebé tama no sai husi Timor-Leste, kategoria ba tipu 10 mak Timor-Leste, Indonézia, Austrália, Xina, Portugál, Filipina, Singapura, Japaun, Malázia no Korreia.

Aleinde reseita ne’ebé hetan husi númeru ema tama no sai, turista sira mós halo violasaun vistu tanba balun mai ho vistu turista halo fali atividade profisionál. Ho nune’e ba sira ne’ebé komete violasaun bainhira operasaun rotina identifika automátika sira selu koima nune’e mós hirak ne’ebé vistu kaduka.

Implementasaun multa ne’e bazeia ba lei imigrasaun númeru 9/2003, ne’ebé hatete, valór multa sé hahú husi loron ida to’o 30 ita kobra dolar 75 até 150 depois mais loron 90 kobra dolar 500 ne’e ba vistu kaduka.

Maibé sé sidadaun ida mak halo violasaun vistu,  kada ema ida  fó multa dolar 250 mas kuandu husi desizaun primeira instánsia imigrasaun nian deside multa dolar 250 mak ema ne’e la aseita, nia bele halo rekursu ba ministru mas ministru nia despaxu aseita desizaun imigrasaun nian fó kedan dolar 500 mas durante ne’e nunka akontese.

(Jornalista : Maria Auxiliadora)

(Editór : Manuel Pinto)

HUSIK IDA HATÁN