Fretilín Sei La Ukun Mesak

0
110
Mari Alkatiri

DILI (TATOLI)–Sekretáriu Jerál Partidu FRETILIN, Mari Alkatiri hateten prosesu ukun ne’e presiza inklui rekursu umanu sira hosi partidu seluk tanba esperiénsia hatudu ona katak bainhira atu ukun ne’e pertense de’it ba partidu mais votadu.

Eis Primeiru Ministru hato’o lia hirak ne’e ba jornalista sira iha Hotel Novo Turizmo, Lesidere, Dili, tersa dadeer, hafoin sorumutu ho estrutura Partidu Demokrátiku (PD) hodi deskuti kona-ba akordu inkluzaun ba formasaun governu.

Tuir nia katak ukun hodi kontra fali partidu seluk mós laiha razaun tanba oras ne’e iha faze harii Estadu no nasaun no nia realsa katak  nasaun no Estadu ne’e hotu-hotu nian, la’ós partidu ne’ebé manán iha eleisaun nian mesak.

“Tanba ne’e maka FRETILIN kontinua hakbesik an ba PD hanesan partidu ida ne’ebé iha baze forte no hanesan partidu jerasaun foun. Sé dehan iha tinan liman mai ne’e halo mudansa jerasionál, entaun tenke konsistente ho filozofia ida ne’e (mudansa jerasionál),” Mari esplika.

Nia haktuir katak enkontru ho estrutura PD furak tebes tanba FRETILIN la aprezenta kondisoens no PD mós la aprezenta kondisoens, maibé ho de’it prinsípiu ida hakarak serbisu hamutuk.

Iha tempu badak, líder FRETILIN ne’e promete katak sira sei públika ba mídia kona-ba akordu inkluzaun.

Iha biban ne’e, Prezidente Partidu Demokrátiku (PD), Mariano Assanami Sabino hateten PD sempre kaer nia filozofia katak ba Timor PD prontu serbi.

“PD ba serbi rai ida ne’e laiha kondisaun. PD prontu fó nia kontribuisaun ba rai ida ne’e,” Assanami informa.

(Jornalista: Xisto Freitas)

(Editór : Manuel Pinto)

HUSIK IDA HATÁN