FRETILIN-PLP Konkorda Koligasaun

0
1986

DILI (TATOLI)—Partidu Frente Revolusionáriu Timor-Leste Independente (FRETILIN), ho Partidu Libertasaun Populár (PLP) konkorda malu ona ba koligasaun maibé sei diskute téknikamente kona-bá koligasaun hodi forma VII governu konstitusionál no ignora formatu insidénsia parlamentár inklui governu inkluzaun.

“Ami rua ko’alia naruk uitoan maibé ami konkorda malu katak di’ak liu hosi ne’e ba oin atu diskute de’it kona-bá koligasaun,” Sekretáriu Jerál FRETILIN, Mari Alkatiri ba jornalista sira hafoin enkontru iha Otél Novo Turizmu, ohin.

Mari Alkatiri dehan diskusaun kona-bá formatu koligasaun FRETILIN ho PLP sei diskute hosi aban no bainrua ba oin.

“Aban bainrua ami diskute tékniku ba koligasaun,” Alkatiri realsa tan.

Iha fatin hanesan  Prezidente Partidu PLP, Taur Matan Ruak reforsa katak, PLP konkorda atu diskute kona-bá koligasaun.

“Ami sei diskute kona-bá koligasaun,” Taur hato’o ho badak de’it ho lian Portuguesa.

Enkontru lideransa FRETILIN ho PLP ohin seksaun dahuluk realiza de’it hosi Sekretáriu Jerál FRETILIN, Mari Alkatiri ho Prezidente PLP, Taur Matan Ruak hafoin ne’e ba seksaun daruak foin autoriza estrutura tomak hodi hola parte iha diskusaun ne’e.

Hatán ba kona-bá se los mak sei asume kargu Primeiru Ministru hodi lidera VII Governu, Prezidente Taur Matan Ruak dehan, “seidauk” iha sorin seluk, Sekretáriu Jerál FRETILIN, Mari Alkatiri ho halimar hasa’e lia hodi dehan, “imi hakarak ema oin di’ak ka oin at.”

Antes ne’e, Prezidente Partidu Libertasaun Populár (PLP), Taur Matan Ruak hateten PLP sei la tama iha koligasaun ruma hodi forma governu maibé hakarak sai opozisaun edukativu iha iha Parlamentu Nasionál

“Ami hanesan partidu ki’ik, partidu ida ne’ebé vokasionadu liu ba opozisaun. Ami kompromete an katak sai opozisaun ida ne’ebé edukadu, rasionál no konstrutivu”, Taur Matan Ruak afirma.

Nia dehan kontente ho rezultadu eleisaun tanba antes ne’e la imajina hakat liu barreira porsentu haat maibé ikus mai hetan to’o kadeira ualu. Tanba ne’e, PLP sei prepara an di’ak ba eleisaun jerál 2022.

Eis Prezidente Repúblika ne’e promete sei la ba túr hanesan deputadu. “Ha’u sei la ba Parlamentu Nasionál, maibé entrega ba foin sa’e sira. Ha’u hakarak iha li’ur de’it para serbisu ba partidu,” dehan tan.

Biban ne’e, Matan Ruak elojiu populasaun sira ne’ebé durante ne’e partisipa iha eventu demokrasia ho pasífiku tebes no toleránsia aas.

(Ekipa Kobertura)      

HUSIK IDA HATÁN