FRETILIN Lakohi Ansi Forma Governu

0
1596
Lider partidu FRETILIN, Mari Alkatiri ko'alia ba jornalista sira hafoin hasoru malu ho Xefe Estadu iha Palásiu Prezidensiál Nicolau Lobato, Bairo Pite, ohin. Foto Tatoli/Xisto Freitas

DILI, (TATOLI) – Sekretáriu Jerál Partidu FRETILIN, Marí Alkatiri informa, to’o ohin loron nia seidauk kontaktu ho Prezidenti Partidu Kongresu Nasionál Rekonstrusaun Timor (CNRT-sigla portugés), Kay-Rala Xanana Gusmão tanba foin lalais maka Tribunál Rekursu legaliza rezultadu eleisaun parlamentár no foin maka Prezidente Repúblika bolu partidu polítiku sira hodi husu sira nia ideia ba formasaun governu.
“Ha’u hanoin ita labele ansi tanba de’it kadeira, maibé la’o neneik nune’e bele forma Governu ida kompetente atu responde povu nia nesesidade. Biar ami na’in rua irmaun Xanana seidauk kontaktu malu maibé ami iha hanoin ne’ebé hanesan ba Timor nia di’ak”, afirma.

Partidu FRETILIN kontinua ho nia polítika hakuak ema hotu hosi partidu oi-oin atu kontribui ba dezenvolvimentu iha rai laran.

“Povu nia intendementu klaru. Intendementu ne’ebé hahú hosi 2013 mai leten ne’e tenke kontinua no hakuak tan sira seluk”, hato’o ba jornalista sira iha Palásiu Prezidente Nicolau Lobato, Bairu-Pité, kinta ne’e, hafoin sorumutu ho Xefi Estadu, Francisco Guterres Lú Olo hodi deskuti kona-ba formasaun governu foun.

Nia informa povu hakarak lori nasaun ida ne’e prósperu no lakohi ona krize hodi fahe povu no harahun nasaun.

Tanba ida ne’e, Marí informa, Timor-Leste presiza Governu ida aberta atu bele konsulta ho konfisaun relijioza no sosiedade sivíl sira.

Hafoin enkontru ho reprezentante FRETILIN iha tuku 9:15, kontinua kedas enkontru ho reprezentante partidu CNRT iha tuku 11:00 no lorokraik ho delegasaun partidu Libertasaun Populár (PLP) iha tuku 15:00.

Sesta, aban, hala’o enkontru mós ho reprezentante PD no KHUNTO.

Jornalista: Xisto Freitas

Editora: Rita Almeida

HUSIK IDA HATÁN