FRETILIN Kontinua Buka Dalan ba Formasaun Governu

0
1875
Lider partidu FRETILIN ho PD halo intervista ho jornalista sira hafoin enkontru ba formasaun governu iha Otel Novo Tuzismu, ohin. Foto Tatoli/Antonio Goncalves

DILI, (TATOLI) – Hafoin halo negosiasaun ho Partidu Demokrátiku iha Otél Novo Turizmu, ohin, partidu Frente Revolusionariu Timor-Leste Indepéndente (FRETILIN) kontinua buka dalan hodi forma sestu governu konstitusionál.

Prezidente PD, Mariano Assanami Sabino ho SekJer FRETILIN, Mari Alkatiri iha Otel Novo Turizmu, ohin. Foto Antonio Goncalves

“Partidu lima iha vontade hanesan atu lori Estadu ne’e ba oin”, hatete Sekretáriu Jerál partidu FRETILIN, Mari Alkatiri ba jornalista sira hafoin hasoru malu ho lider PD sira. “Tanba ne’e ami buka hela dalan atu kopera, dalan ida ne’ebé mantein indepéndensia partidu ida-idak nian hodi lori Estadu ne’e ba oin”.

Mari konsidera sorumutu ne’e la’o di’ak tanba kumpriende malu ho hanoin lori Estadu no rai ne’e ba oin. “Ida ne’e baze ida di’ak tebes, laiha ona ida akontese uluk ne’e tanba iha ona sentidu responsabilidade”.

Entretantu, Prezidente PD, Mariano Assanami Sabino hatete ninia parte sei lori rezultadu ne’e ba enkontu nivel estrutura partidu, nune’e hato’o fali sira nia pozisaun iha formasaun governu ba enkontru daruak ho FRETILIN.

“PD sempre aposta interese Estadu, hanoin aberta ba dialogu hodi haree ba interese Estadu  no Nasaun”, afirma Assanami.

Partidu lima ne’ebé hakat liu barreira pursentu haat maka FRETILIN hetan kadeira 23 iha Parlamentu Nasionál, Kongresu Nasionál Rekonstrusaun Timor (CNRT-sigla portugés) kadeira 22, Partidu Libertasaun Populár (PLP) kadeira ualu, PD kadeira hitu no Kmanek Haburas Unidade Nasionál Timor Oan (KHUNTO) kadeira lima.

Esforsu ba formasaun governu, FRETILIN halo ona enkontru dahuluk ho partidu CNRT, PLP no PD, ikus ho KHUNTO sei akontese aban iha fatin ne’ebé hanesan.

Ekipa tatoli

HUSIK IDA HATÁN