Finaliza Plataforma PR Sei Hili PM Lidera VII Governu

0
2195

DILI (TATOLI)—Partidu Frente Revolusionáriu Timor-Leste Independente (FRETILIN), ho Partidu Libertasaun Populár (PLP) Ohin, Kuarta (16/8) sei tuur hamutuk hodi diskute plataforma governasaun ne’ebé ikus mai nia rezultadu entrega ba Prezidente Repúblika hodi hili Primeiru Ministru ba VII Governu.

“Bainhira diskusaun ba plataforma governasaun foun ne’e finál ona, sei aprezenta ba Prezidente Repúblika, nune’e bele nomeia Primeiru Ministru,” Sekretáriu Jerál FRETILIN Mari Alkatiri ba jornalista sira iha Palásiu Prezidente Nicolau Lobato, Bairru-Pité, foin lalais ne’e.

Diskusaun plataforma governasaun entre FRETILIN ho PLP, ohin sei hala’o iha Otél Novo Turizmu, iha tuku 15H00.

Entretantu ba loron aban, Kinta (17/08) partidu FRETILIN sei kontinua halo diskusaun ho Partidu KHUNTO iha tuku 9H00 dader, iha Novo Turizmu mós.

Antes ne’e, Partidu FRETILIN mós halo enkontru ho partidu Kongresu Nasionál Rekonstrusaun Timor (CNRT) ne’ebé hetan kadeira 22 iha IV lejizlatura nune’e mós ho Partidu Demokrátiku (PD) kadeira hitu inklui PLP kadeira ualu, ho KHUNTO kadeira lima, maibé CNRT ho PD ikus mai la avansa ba diskusaun daruak nian tanba FRETILIN konvida de’it PLP ho KHUNTO.

Entretantu lideransa partidu PLP ho KHUNTO afirma ona katak la iha duvida atu halo konversasaun substansiál atu harii plataforma entendimentu ne’ebé metin no seguru governasaun nian.

“Ha’u nia partidu ami disponivel tanba povu fahe nia votu uitoan-uitoan ida mesak la bele entaun sira (FRETILIN) fiar ami hakarak ko’alia ami, ami disponivel ba ko’alia,” Prezidente PLP, Taur Matan Ruak afirma.

Nune’e mós Sekretáriu Jerál Partidu KHUNTO, José Agostinho da Silva haktuir “Ami prontu kolabora ho Partidu FRETILIN.”

(Ekipa Kobertura)

HUSIK IDA HATÁN