Estraga Karreta 12, MUTL Husu PNTL Investiga

0
183
Asaun MUTL loron ohin nian. Foto Tatoli: Rafy Belo

DILI (TATOLI)—Movimentu Universitáriu Timor-Leste (MUTL) husu ba Polísia Nasionál Timor Leste (PNTL) atu halo investigasaun profundu hodi identifika autór kriminozu ne’ebé mak infiltra iha asaun demonstrasaun MUTL nian.

Tuir reprezentante MUTL, Atanasio Belo, karreta 12 inklui RTTL, Ep nian ne’ebé hetan estragu la’ós halo hosi membru MUTL, maibé ida ne’e terseiru parte mak estraga.

 “Klarifika ba públiku katak kulpa no asaun ne’e la’ós MUTL nian. Asaun MUTL halo kontra leilaun Prado ne’e asaun organizadu no konfirmandu ho parte seguransa liuliu PNTL (Polícia Nacional Timor-Lorosa’e) hodi fó protesaun no asegura prosesu tomak manifestasaun nian,” Atanasio klarifika iha Kampus Ekonomia, Resende-Dili, ohin.

Atanasio mós la espera katak iha asaun ne’ebé mak MUTL halo bele kontamina ho terseiru parte.

“Ami la espera katak iha parte terseiru. MUTL nia pozisaun husu ba PNTL atu halo investigasaun kle’an ba asaun perturvasaun iha manifestasaun horisehik hodi rezulta estudante, komunidade kanek no estragu kareta estadu kuaze 12,” nia husu.

Hodi klarifika katak, laloos opiniaun públiku konsidera MUTL mak sai nu’udar autór ba perturbasaun iha situasaun manifestasaun.

MUTL husu ba públiku liuliu inan-aman sira hotu iha territóriu laran tomak katak MUTL organiza manifestasaun la’ós ho anarkizmu maibé manifesta kontra leilaun Prado ho asaun pasifika.

Ba Parlamentu Nasionál atu labele bosok públiku kona-ba suspende ba karreta leilaun Prado tanba realidade hatudu katak xapa matríkula troka tiha ona tan ne’e MUTL ezije atu parlamentu nasionál atu anula lalais rezolusaun ba leilaun karreta Prado ne’ebé prejudika povu nia moris.

Husu mós PNTL atu liberta sira-nia portavós no maluk estudante hamutuk 13 ne’ebé ohin loron sei detein hela iha detensaun PNTL, Kaikoli, Dili.

Ba loron ohin MUTL organiza asaun nonook iha Parlamentu Nasionál nia oin tan ne’e husu ba PNTL atu kolabora hodi asegura MUTL nian asaun.

(Jornalista: Rafy Belo)

(Editór : Manuel Pinto)

HUSIK IDA HATÁN