Empreza 42 Selu Koima U$43.000 Ba AIFAESA

0
106
Diretór Departamentu Asuntu Jurídiku no Koordenasaun, AIFAESA, Domingos Nunes.

DILI (TATOLI)-Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) hahú notifika empreza infratór hamutuk 42 hodi selu koima, no totál koima ne’ebé tama ona iha kaixa AIFAESA nian hamutuk mil U$43.000 iha fulan-fevereiru 2017 to’o agora.

“Osan U$43.000 ne’e husi empreza 42 no empreza ida mak hetan U$2.000 no empreza 41 ne’e selu U$1.000. Empreza ida selu U$2.000 ne’e tanba nia infrasaun boot tebes no hetan prosesu rua, tanba ne’e mak nia selu hanesan ne’e,” Diretór Departamentu Asuntu Jurídiku no Koordenasaun, AIFAESA Domingo Nunes hatete iha Matadouru, ohin.

Aliende ne’e prosesu kontra ordenasaun ne’ebé tama iha AIFAESA husi fevereiru to’o mai agora hamutuk 316 no notifikasaun ba loron 15 la’o hela no prosesu mós ba loron sanulu ba notifiksaun finál.

Tuir Domingos Nunes notifikasaun loron 15 ne’e atu empreza infratór sira halo defeza hafoin halo instrusaun ba prosesu hodi aprezenta ba koordenadór AIFAESA atu toma desizaun finál.

Iha prosesu ba empreza 42 hodi toma desizaun finál komesa iha Abríl 2017 tanba AIFAESA halo prosesu ba livru sobre pagamentu nomós konta bankária AIFAESA nian, nune’e iha fulan ne’e mak notifika infratór sira hodi seluk koima.

Bainhira selu ona, tuir Dekretu Lei númeru 23 katak koima ne’ebé selu husi empreza infratór sira ne’e porsentu 40 ba kaixa Estadu no porsentu 40 ba AIFAESA.

No bazeia ba prosedimentu AIFAESA nian, bainhira empreza ida mak halo infrasaun dala-tolu tuir malu iha tinan ida, inspetór AIFAESA sei foti sansaun hodi halo enserramentu temporáriu para ba oin labele komete tan infrasaun.

Sansaun ne’ebé AIFAESA hodi eduka sira (Empreza) no tuir misaun ne’ebé mak iha fó protesaun ba direitu konsumidór sira no proteje sira atu labele hetan ai-han ne’ebé mak iha risku.

Tanba ne’e mak devér AIFAESA fó prevensaun nomós fó hanoin nafatin ba ita-nia operadór ekonómiku sira labele kontinua halo nafatin erru ne’ebé mak iha, sé erru ne’e iha nafatin com serteza komete nafatin infrasaun, AIFAESA sei fó nafatin sansaun liuhusi prosesu administrativu, ho dalan sei fó koima.

AIFAESA promete sei kontinua halo inspesaun no prevensaun atu labele akontese infrasaun. AIFAESA mós husu ba konsumidór sira ne’ebé mak bá iha estabelesimentu sira hodi sosa produtu ruma no produtu ne’e estragadu ka liu prazu, AIFAESA iha nia divizaun informasaun públika ne’ebé bele simu keixa sira  importante no keixa tenke iha faktu.

(Jornalista : Maria Auxiliadora)

(Editór : Manuel Pinto)

HUSIK IDA HATÁN