Ema Potensiál PD Inklui Iha Governu Foun

0
1929
Lider PD no FRETILIN iha entrevista ho jornalista sira iha Otél Novo Turizmu, sesta dadeer ne'e, hafoin sorumutu kona-ba harii governasaun ida forte liu. Imajen Ajénsia TATOLI/Xisto Freitas

DILI (TATOLI)–Partidu Demokrátiku (PD) hetan oportunidade hodi inklui mós iha Governu Koligasaun ne’ebé harii hosi partidu tolu hanesan FRETILIN, PLP no KHUNTO.

“Maski FRETILIN ho partidu rua seluk maka halo koligasaun maibé inklui nafatin rekursu potensiál hosi partidu seluk no ema independente iha governasaun foun,” Sekretáriu Jerál Partidu FRETILIN, Dr. Mari ko’alia asuntu ne’e ba jornalista sira iha Otél Novo Turizmu, Lesidere, Dili, Sesta dadeer ne’e, hafoin sorumutu ho estrutura PD.

Nia informa katak nia kontente loos tanba lideransa PD kompriende ona prosesu ida ne’e atu serbisu hamutuk.

“Koligasaun ne’ebé maka iha ona ka la’o daudaun ne’e ho objetivu atu hetan maioria absoluta para sustenta governu, maibé governu mai ne’e sei forte liu-tan kuandu inklui mós PD,” nia dehan.

Iha biban ne’e, Prezidente Partidu PD, Mariano Assanami Sabino hateten, dezde inísiu, sira sempre dehan PD prontu atu serbí Timor sein kondisaun. “Tanba ne’e, ami aseita para hola parte ba iha governu ida ne’e to’o tinan 2022,” nia deklara.

Ko’alia kona-ba PD ba ho indivíduu ka lae, Assanami hatán, sira mai diskute ho estrutura partidu mais votadu kona-ba governasaun ne’e reprezenta partidu, la’ós reprezenta indivíduu, maibé nia dehan katak depois parte tékniku maka sei diskute hodi define di’ak liu-tan asuntu ne’e.

(Jornalista: Xisto Freitas)

(Editór : Manuel Pinto)

HUSIK IDA HATÁN