Dever Estadu mak Valoriza Kontribuisaun Veteranu

0
104
Prezidente Repúblika, Francisco Guterres Lú Olo halo pasa revista ba formatura iha komemorasaun loron FALINTL-FDTL ba dala 42 iha kuartel jerál Fatuhada, domingu, (20/8). Foto Tatoli/Antonio Goncalves

DILI, (TATOLI) – Prezidente Repúblika, Francisco Guterres Lú Olo hateten Estadu iha devér atu rekoñese no valoriza kontribuisaun hosi veteranu no kombatente libertasaun nasionál sira.

Nia husu Estadu atu garante protesaun espesiál liuhosi polítika insersaun sosiál no programa apoiu iha área saúde, edukasaun, formasaun tékniku-profisionál, empregu, asesu ba kréditu no liuhusi mós atividade atu bele hetan rendimentu.

“Atu bele hetan rendimentu, ita tenke fila fali ba estatutu veteranu kombatente no libertasaun nasionál”, Xefe Estadu hato’o deklarasaun ne’e iha seremónia komemorasaun aniversáriu FALINTIL ba dala 42 iha Kuartel Jenerál F-FDTL iha Fatuhada, domingu (20/8).

Lú Olo haktuir veteranu barak la hetan dalan atu estuda iha eskola no universidade sira. Sira aprende iha ai-laran, dook hosi aldeia no sidade, maibé sira halo kna’ar iha área edukasaun boot teb-tebes liuhusi sira nia esperiénsia, pesoál no koletiva, susar sira ne’ebé sira hasoru, sira-nia kna’ar, saida maka sira sente, saida maka sira halo, sá esperiénsia vida mka halo sira sai forte liu no halo sira konsege aprende hosi sira-nia kna’ar loro-loron nian.

“Patriotizmu, solidariedade, korájen, espiritu misaun no vontade atu manán, la’ós valór sira ne’ebé veteranu de’it maka tenke iha. Valór sira ne’e importante mós ba profisaun ne’ebé de’it no ba organizasaun públika ka privada sira atu funsiona ho di’ak. Ita-nia solidariedade ohin loron nian hatudu kompetisaun ne’ebé haliis liu-liu interese hanesan ho Estadu no nasaun nian. Tanba ne’e, espíritu veteranu sira-nian, ne’ebé haburas iha luta tinan 24 nia laran, maka espíritu ida ne’ebé tenke hatama no hametin iha eskola sira, iha Estadu, iha desportu, atu hetan beibeik susesu, atu bele la’o ba oin, iha ita-nia serbisu ne’ebé de’it no iha ita-nia relasaun ho ema hotu-hotu”, informa.

Tuir Lú Olo katak laiha povu ida bele haburas-án sein edukasaun. Katak, joven sira presiza hatene oinsá manán fali independénsia, oinsá halo funu, oinsá uza matanek rasik atu hamosu buat foun, oinsá hanoin no halo planu ba lala’ok sira.

“Ha’u hakarak aproveita loron ohin, halo tinan haat nulu resin rua, atu hatama iha ajenda nasionál kna´ar foun ida, ne’ebé ha’u fó importánsia no valór estratéjiku ba vida joven sira-nian no ba ita-nia povu tomak. Kna´ar foun ne’e maka Serbisu Síviku Nasionál”, afirma.

Nia hatutan sosiedade ohin loron nian simu maka’as no hetan influénsia oi-oin hosi rai sira seluk, ita bele haree daudaun katak ema mós haliis liu-liu ona ba sira-nia án rasik, la hanoin kaúza públika ka preokupasaun hotu-hotu nian, laiha sentimentu patriótiku, laiha sentimentu katak ita ida-idak pertense ba povu ida,  nasaun ida ba serbisu Síviku Nasionál ne’ebé loke dalan ba integra joven sira, mane no feto, atu ida-idak fó ninia kbiit no matenek no aprende valór solidariedade ka fó-liman ba malu ba hadi’a no haburas rai ida ne’e.

Prezidente hato’o nia glorioza ba Forsas Armadas, FALINTIL-Forsas Defeza Timor-Leste (F-FDTL), ne’ebé mai no haburas-án hosi FALINTIL, hatudu ona saída maka forsas halo di’ak hori uluk no sei halo ohin loron ho dedikasaun tomak.

Jornalista: Xisto Freitas

Editora: Rita Almeida

HUSIK IDA HATÁN