Deputadu Foun Sei Sae Karreta Ho Folin U$45.000

0
615
Deputadu Bankada Coselho Nacional Reconstrução Timor-Leste (CNRT), Natalino dos Santos.

DILI (TATOLI)—Sekretáriu Jerál Parlamentu Nasionál, Mateus Belo informa tuir planu Parlamentu Nasionál (PN) sei sosa karreta foun ba deputadu sira iha lejislatura dahaat nian ho folin kada karreta mil U$45.000. Prosesu sosa karreta entrega ona ba Komisaun Nasionál Aprovizionamentu (CAN-sigla iha portugés) hodi halo konkursu públiku.

“Karreta foun fulan tolu ka haat mak foin bele iha tanba sei iha tenderizasaun (konkursu públiku), sekretariadu la kaer karreta ne’e, entrega ba CAN mak halo tender. Halo prosesu tiha ona no iha ona publikasaun tanba ne’e agora hein de’it”, Mateus informa iha PN, ohin.

Entretantu karreta tuan ne’ebé iha sei leilaun hosi deputadu tuan previléjiu ida ba deputadu sira durante tinan lima iha PN no fó direitu ba sira.

“Leilaun maiór parte halo ona mas sira iha atu halo leilaun até loron 21 kuandu lejislatura foun komesa sira lejizlatura agora mós akaba entaun sira bele sai ona no halo leilaun ba karreta sira ne’e, kuandu la leilaun karreta hela ba Parlamentu,” Belo esplika tan.

Iha fatin hanesan Prezidente PN Adérito Hugo da Costa hatete relasiona ho sosa karreta foun ba deputadu iha kuartu lejizlatura la’ós buat foun tanba iha debate Orsamentu Jerál Estadu 2016 verba ida ne’e tau kedan atu hola.

Ba leilaun karreta tuan Aderito Hugo haktuir desizaun iha konsellu administrasaun ne’ebé kompostu husi reprezentante bankada hotu no ida ne’e kontinua de’it deliberasaun ne’ebé halo dezde lejizlatura daruak no iha fin mandatu fó espasu ba deputadu sira, fó espasu atu partisipa leilaun espesiál ida ba deputadu sira tuir deliberasaun PN nian, maibé la’ós obrigatóriu signifika deputadu interese atu partisipa, sé lá interese entaun buat ne’e husik nafatin iha Parlamentu hanesan asset Parlamentu depois loke ba públiku.

Deputadu Bankada Coselho Nacional Reconstrução Timor-Leste (CNRT), Natalino dos Santos aumenta leilaun karreta deputadu nian iha Parlamentu Nasionál (PN) ne’e buat ida normál iha Estadu Timor-Leste nian maibé relasiona ho leilaun mak korrupsaun bele halo investigasaun.

Basa Konsellu administrasaun ne’ebé reprezenta bankada hola parte iha PN. Sira mak haree no tetu depois lori ba plenária no soberana plenária mak deside. Agora desizaun ne’e Parlamentu Nasionál hotu mak deside, sé tuir isu ema dehan katak ne’e korrupsaun favór bele iha instituisaun balun ne’ebé halo investigasaun no entanto Parlamentu transparénsia divulga ba públiku katak Parlamentu Nasionál halo leilaun interna ba karreta ne’ebé tinan lima deputadu sira ezerse no fó tempu ba deputadu sira halo leilaun.

Tuir Natalino PN jere nia autónoma administrasaun ne’ebé iha regra sira fó biban no iha mós órgaun ida ne’ebé trata sobre delibera asuntu ruma mak Konsellu Administrasaun ne’ebé foti desizaun tomak ba nia implementasaun.

“Opiniaun públika dehan ladi’ak, karik kontra lei ami deputadu sira iha devér morál atu asume responsabilidade. Será que leilaun Parlamentu nia mak sai isu boot ne’e depende, respeita sosiedade sivíl nia krítika, krítika ne’e atu hadi’a, ba oin bele hadi’a tan no haree saida mak di’ak ba rai ida ne’e maibé regra interna fó dalan ba deputadu sira ne’ebé hotu ona nia mandatu, iha interese bele halo leilaun ba karreta ne’e,” Natalino konklui.

Hodi relata karreta deputadu sira-nian ne’e haree mak Prado maibé nia kondisaun ladún di’ak no nia manutensaun boot tebes tanba durante tinan lima nia laran dezlokasaun deputadu nunka para iha terrenu.

(Jornalista : Maria Auxiliadora)

(Editór : Manuel Pinto)

HUSIK IDA HATÁN