CNRT Tau Ás Interese Nasionál

0
1295
Sekretáriu Jerál CNRT, Francisco Kalbuadi Lay no Primeiru Vise Prezidenti CNRT, Virgílio Smith dadalia ho jornalista sira hafoin sorumutu ho Xefi Estadu Lú Olo. Imajen Ajénsia TATOLI/Xisto Freitas

DILI (TATOLI)—Sekretáriu Jerál Partidu Congresso Nacional da Reconstrução de Timor (CNRT), Francisco Kalbuadi Lay hateten CNRT tau intrerese nasionál ás liu interese partidu.

“Hotu-hotu tenki konsidera interese nasionál tau ás liu interese partidu ida-idak nian,” Kalbuadi hato´o informasaun ne´e ba jornalista sira iha Palásiu Prezidenti Nicolau Lobato, Bairru-Pité, Dili, kinta ne´e, hafoin inkontru ho Prezidenti Repúblika, Dr. Francisco Guterres Lú Olo hodi ko´alia kona-ba formasaun governu.

Ba Xefi Estadu no jornalista sira, Kalbuadi informa, sira seidauk bele deklara tama iha formasaun governu ka lae tanba desizaun sei fó sai liuhusi konferénsia nasionál ne´ebé hala´o durante loron rua (4-5 Agustu).

“Ami labele ko´alia buat ida enkuantu konferénsia seidauk hahú. Konferénsia maka fó sai rezultadu no respeitu ba konfresista sira nia desizaun,” nia haklaken no hatutan katak konferénsia partidu CNRT sei hala´o iha Sentru Konvensaun Dili (CCD).

Atuál Ministru Turizmu ne´e dehan Prezidenti Partidu CNRT, Kay-Rala Xanana Gusmão maka sei diriji konferénsia refere.

Sorumutu ho Prezidenti Repúblika, Prezidenti CNRT la marka prezensa maibé delega de´it Sekretáriu Jerál CNRT no Primeiru Vise Prezidenti CNRT, Virgílio Smith. “Ami mai reprezenta partidu no konvite ne´e dehan konvida partidu, entaun, prezidenti partidu la marka prezensa mós di´ak,” Kalbuadi dehan. (Jornalista: Xisto Freitas)

HUSIK IDA HATÁN