BNCT Husu BSTL Hatún Montante Osan Kréditu Empreza

0
171
Prezidente Konsellu Administrasaun, BNCTL, Brígido de Sousa. Foto/Egas Cristovão.

DILI, (TATOLI)- Prezidente Konsellu Administrasaun, Banku Nasionál Komérsiu Timor-Leste (BNCTL-sigla iha portugés), Brígido de Sousa husu ba Banku Sentrál Timor-Leste (BSTL) atu hatún folin osan kréditu mill US500 tuir regulamentu sistema garantia kréditu tanba BNCTL konsidera montante osan boot liu.

“Ami mós ko’alia ona ho banku sentrál karik mil U$500 ba kada kompañia ne’e aas demais. Sé ema ida mai hakarak tiha mil U$500, nia aprezenta planu negósiu ida ne’ebé di’ak, viavel entaun ita fó tiha U$500 entaun millaun U$4 ita bele dehan ema hotu mai hanesan ne’e, ema na’in-ualu de’it mak hetan, osan hotu tiha ona,” Brígido hatete iha Avenida Prezidente Nicolau Lobato, ohin.

Tuir proposta BNCTL montante osan bele tun ba mil U$250 ka 100 iha másimu para ema hotu bele iha ekilíbriu, nune’e empreza ki’ik sira bele hetan mil U$10 ka 50 tanba sira hahú negósiu husi ki’ik, sé tau kedan boot bele kria fali dezekilibradu entre sira.

Brígido hatutan bainhira hatún uitoan ba másimu U$100, millaun U$4 ne’ebé Governu prevee ba sistema ne’e pelu menus ema barak mak sei hetan sistema garantia kréditu.

“Foin mak atu hahú hanesan pilotu ida mas sé la’o di’ak hanoin Governu iha tinan-tinan sei aumenta tan osan iha eskema garantia ne’e para hodi iha disponibilidade fundu ba ita-nia setór privadu liuliu sira ne’ebé ki’ik ho médiu atu hetan asesu,” Brígido garantia.

Aleinde ne’e sobre kritériu ba empreza ki’ik iha asesu kréditu atu emprega ema na’in-neen to’o 21 sai mós barreira ida tanba ema balun halo negósiu maibé emprega ema ida ka rua de’it.

Tan ne’e husu mós ba Banku Sentrál karik bele, labele tau ema na’in-neen maibé husik de’it emprezáriu sira ne’ebé mak ki’ikoan ne’e atu emprega ema ida ka rua naran katak nia aprezenta proposta ida ne’ebé di’ak, viavel katak bele duni maibé laiha kapitál no garantia entaun nia bele benefísia mós husi eskema garantia kréditu ne’e.

Regulamentu seluk ba empreza médiu nian emprega serbisu-na’ín hamutuk husi 21 to’o 50. Kondisaun sira ne’ebé mak sira tenke aprezenta atu banku bele konsidera mak prienxe kritériu sira ne’ebé define iha Dekretu Lei katak tenke kompañia timoroan no halo negósiu iha área agrikultura em jerál  no kompañia timoroan halo joint venture ho sira li’ur maibé timoroan nia asoens tenke porsentu 75.

“Ida ne’e mak rekizitu ruma ne’ebé banku presiza no konsidera no prienxe bainhira hakarak atu hetan asesu ba eskema garantia kréditu no bainhira tama ona iha eskema garantia kréditu la presiza tan ema seluk atu sai avalista,” Brígido esplika.

(Jornalista : Maria Auxiliadora)

(Editór : Manuel Pinto)

HUSIK IDA HATÁN