Ba Futuru Ema Hotu Iha Responsabilidade Iha Seguransa

0
75
Dosente no Konferensista Institutu Defeza Nasional (IDN), Luís Amado halo intervensaun iha konferensia IDN XXI ho tema: Konsekuensia geopolítika husi “mudansa rejime” iha Washington, iha Muzeu Rezistensia, Tersa (22/8). Foto Tatoli/ Julia Chatarina

DILI (TATOLI) – Dosente no Konferensista Institutu Defeza Nasionál (IDN), Luís Amado hateten ema hotu iha responsabilidade iha nivel defeza, seguransa, polítiku no estadu hodi akompaña sistema internasionál sira tanba importante ba futuru umanidade.

“Agora daudauk iha mundu akontese buat barak ne’ebé iha risku ba seguransa, estabilidade no pás ne’ebé ita la imajina iha tinan kotuk liubá,” Luís Amado tenik iha ámbitu konferénsia IDN XXI ho tema: Konsekuénsia jeopolítika husi “mudansa rejime” iha Washington, iha Muzeu Rezisténsia, Tersa (22/8).

Nia dehan tan ohin loron iha rejiaun mundu tomak, maski iha problema iha fatin balun maibé defaktu sidadaun sira iha responsabilidade iha seguransa, defeza no polítika.

Nune’e nia esplika tema ba konferénsia ne’e orientadu atu debate konaba konsekuénsia mudansa rejime iha Washington. Maibé sei laiha mudansa rejime iha Washington tanba rejiaun forte ida.

Hodi haktuir tan mós katak, ema hotu la imajina Donald Trump ho ninia programa no polítika bele eleitu sai Presidente Estadus Unidus Amérika (EUA) tanba jeneralidade Amerikanu sira antes eleisaun la tau prioridade ba Trump.

Mudansa rejime tuir nia, provokatóriamente tanba ema ida la hein katak Trump bele eleitu mas bele akontese. Eleitu ho programa no ajenda ho forma aspetu fundamental barak ne’ebé polítika amerikana konsolida durante dékada barak ona.

Eis Auditor Tribunal Kontas konsidera fenómenu ida ne’e hanesan surpreza iha Amérika no iha mundu tomak tanba fulan neen hafoin simu posse mundu tomak sei ajusta adaptasaun modelu divulga no típiku eskema prezidente foun ne’e.

“Ha’u nia hanoin ida ne’e hanesan mudansa rejime tanba iha Amérika sei laiha mudansa rejime ida, mas hanesan lideransa tranzitória husi prezidente tranzitóriu ida ne’ebé hanesan pontu de vista eleitu ne’ebé aprezenta balansu, orientasaun klaru iha ninia governu no administrasaun.” Nia konklui.

(Jornalista: Julia Chatarina)

(Editór : Manuel Pinto)

HUSIK IDA HATÁN