Arepende Sim Maibé Oportunidade Sempre Ba Ema Hotu

0
332
Manuel Tómas Amaral de Carvalho Alias Lito Rambo

DILI (TATOLI)–Arepende sempre mai ikus. Maibé oportunidade sempre iha ba ema hotu ne’ebé hakarak iha mudansa ba nia án, realidade ida ne’e mak ohin loron akontese ba Lito Rambo juventude ida ne’ebé identiku ho problematiku iha tempu Indonézia hodi defende direitu ukun rasik án, ohin loron sai kandidatu ba Deputadu hosi Partidu Demokratico (PD) iha IV lejislatura.

Oan Mane Mesak hosi knua Boramori, suku Afaloikai, Postu Administrativu, Uatocarbau, Municipiu Vikeke nia pasadu nakonu ho istoria metan ho tendensia laiha esperansa hanesan saida mak ohin loron nia iha. Maibé tebes !! ne’e mak realidade, buat hotu akontese liu hanesan ema dehan “Etu sai tiha fali Sasoro” Manuel Tómas Amaral de Carvalho (naran kompletu) ohin loron husik nia pasadu hotu hela ba istória  hodi la halo ema laran moras tan tuku balu eh baku malu.

Dala ruma atu husik hela ita nia karater balun bele dehan katak, Gampang-Gampang Susah maibé la difisil liu bainhira ita disiplina ba ita nia án basa tentasaun sei mosu mai ita ho oin-oin de’it bainhira ita koko atu halo di’ak hotu de’it ba ema hotu.

Manuel Tómas Amaral de Carvalho mak hamrik iha liman los

“Depois Ita Ukun án Ha’u deside tama Partidu Demokratico (PD) ho motivasaun ida katak Timor ukun án ona ne’e signifika ita nia luta ba patria ita atinzi ona, atu liberta tan povu hosi ki’ak no mukit, ha’u involve partidu tanba hau komprende partidu nu’udar instrumentu hodi alkansa mehi liberta povu hosi mukit no ki’ak,” Manelito Boramori (naran familia) kasu lia ne’e bainhira hasoru malu iha nia hela fatin, Praia Coqueiros (Pantai Kelapa) ohin.

“O nia maun ne’e ema ida que luta makas hodi kontra nia án ho hanoin ida husik hela nia mundu ida uluk e agora ha’u haree iha mundansa maibé buat hirak ne’e hotu sura ho ha’u nia motivasaun,” Ersia Savio de Carvalho, fen kaben Kandidatu Deputadu IV lejislatura hosi partidu PD Manuel Tómas Amaral justifika asaun hirak ne’ebé durante nia Kaben halo hodi sai ema polítiku, hafoin husik nia mundu premanismu.

Tribunál finalmente anunsia ona rejultado Elisaun Parlamentar 2017 no partidu PD hetan kadera 7 iha uma fukun Timor-Leste nian. Ho ida ne’e Sekretáriu Jerál Komisaun Polítika Nasionál Partidu PD ne’e (Lito Rambo) tuir lista deputadu hosi partidu PD tempu besik sai tur iha Parlamentu Nasionál hamutuk ho nia maluk nain 64 seluk hodi sai ibun, matan, tilun ba povu Timor-Leste atu fiskaliza, no kontrola orgaun ezekutivu nune’e mós aprova Planu Governu no Orsamentu jerál do Estadu hodi halo dezenvolvimentu ba nasaun doben Timor-Leste.

“Jornada moris ne’ebé ha’u iha admiravel tebes Ha’u rasik la espera, maibé iha ha’u nia moris ha’u sempre sura Maun Jesus iha ha’u nia moris,” Kandidatu Deputadu Bankada PD IV lejislatura ne’e fó sasin kona-bá nia vida.

Lito Rambo ho nia kaben Ersia Savio de Carvalho ho oan feto Mazia Buidara

Hodi dehan tenik, iha vida polítika, ha’u sempre hanoin Prof. Dr. H. Ahmad Syafii Maarif  nia liafuan ida dehan nune’e, “Jangan jadi Politikus sebelum mampu dan cukup dalam urusan keuangan keluarga dan jangan jadikan panggung itu untuk mengais rejeki”  (Keta sai ema politiku, bainhira seidauk iha kapasidade no orsamentu ne’ebé naton ba familia nune’e mos keta sai politiku tanba hakarak uza palku politiku hodi buka sorte).

Realidade Timor-Leste situasaun hirak ne’e iha nia sintoma ho nune’e oan mane mesak e ikun hosi Aman Mateus de Carvalho (Matebian) ho inan Alzira Ximenes (Matebian)  subliña katak, polítiku ne’e buat ida ne’ebé presiza arte no komprende mós siensia atu nune’e politiku nain la bele delek ba polítika enkuantu delek ikus mai sai polítiku tan ba nia intreses nune’e korrupsaun, Nepotizmu buras iha sosiedade nia let.

“Ha’u enkoraja maluk jerasaun foun sira hodi la bele tur nonok atu hein de’it saida mak estadu halo ba ita, maibé hakas án fó ita nia kontribuisaun tomak sein iha reserva hodi ajuda dudu prosesu dezenvolvimentu Timor-Leste tuir mehi funu nain sira nian. Se la’ós ita se tan,” Aman ba oan feto Mazia Buidara ne’e fó hanoin.

Hodi husu Juventude sira katak, tempu ona atu aprende no koko  hakat la bele hein basa realidade hatudu ba nia an rasik maske la iha talentu espesifiku ruma kona ba polítiku maibé ikus mai sai ema polítiku tanba hakarak atu aprende eh kontribui.

(Jornalista : Rafi Belo)

(Editór : Manuel Pinto)

HUSIK IDA HATÁN