APFTL Solidariza Raan hodi Komemora Loron Mundiál Foinsa’e

0
66
Ilustrasaun

DILI, (TATOLI) – Alumni Parlamentu Foinsa’e Timor-Leste (APFTL) komemora Loron mundiál ba foinsa’e ho doasaun no solidariza raan ba ospitál.

Foto hamutuk APFTL. Foto: APFTL

Koordenadór doasaun ran, Ambrosio Colo informa atividade ida ne’e hala’o hodi refleta ba mundu no nu’udar atividade solidariedade ida katak joven mós iha fuan solidáriu hodi orefese raan ba ema ne’ebé mak presiza.

“Liliu ba pasiente sira iha ospitál ne’ebé presiza raan, presiza tulun husi joventude sira”, koordenadór  ba ajénsia Tatoli iha Uma Biti Boot, SEJD (Sekretáriu Estadu Joventude no Desportu), Lecidere, ohin.

APFTL organiza atividade ida ba dala tolu ona, hahú 2015 to’o 2017. SEJD mós tau-matan nafatin ba APFTL.

“Iha doasaun raan, identifika ema na’in 29 mai husi estudante universitáriu sira, F-FDTL (FALINTL-Forsa Defesa de Timor-Leste) nomós grupu voluntáriu”, informa estudante Fakuldade Siénsia Ezata, UNTL (Universidade Nacional Timor Lorosa’e) ne’e.

Koordenadór ne’e relata ema barak inklui SEJD rasik, ohin, hakarak atu doa sira-nia raan maibé identifikadu husi pesoál saúde husi HNGV (Hospitál Nasionál Guido Valadares) katak tensaun la di’ak tanba ne’e rejeita hodi hasai sira-nia raan.

“Ida ne’e la’ós difikuldade ba ami, importante la’o susesu”, hateten koordenadór ne’e hodi hein katak atividade hanesan sei hala’o nafatin tuir rekomendasaun ne’ebé sira hetan. Katak, se bele atividade hanesan hala’o mós iha eskola, universidade.

Entretantu lema ba atividade doasaun raan mak ”Ha’u-nia Raan Bele Salva Ema Seluk”. No sita mós lema BNS (Banco Nacional de Sangue), HNGV nian katak “Ran Turuk ida, Salva Ema nia Moris”.

Atividade ne’e halao hodi selebra loron Internasionál ba Foinsa’e 12 agustu. Atividade ne’e realiza tanba hetan apoiu husi SEJD.

Jornalista: Rafy Belo

Editora: Rita Almeida

HUSIK IDA HATÁN