AMRT Komemora 30 Agostu ho Konkursu Puízia

0
42
Ilustrasaun

DILI, (TATOLI) – Arkivu no Múzeu Rezisténsia Timor-Leste (AMRT) organiza konkursu aprezentasaun puízia rezisténsia ba eskola sekundáriu sira iha kapitál Díli hodi komemora aniversáriu ba 18 konsulta populár 30 agostu.

Xefe Departamentu Arkivu no Muzeolojia, Moises de Jesus informa, AMRT selebra loron importante sira hamutuk ho estudante sira nune’e atrai sira hodi manan espíritu nasionalizmu no iha hanoin, hatene rekoñese no valoriza luta rezisténsia nian.

“Ita hotu presiza hatene katak luta sira ne’e la’ós fásil maibé liuhusi fakar ruin no ran, mate hodi alkansa objetivu ukun rasik aan”, hateten Moises de Jesus ba profisionál komunikasaun sosiál sira iha salaun AMRT, Dili, ohin.

Tan ne’e, AMRT selebra serimónia ida ne’e hodi atrai estudante eh joven sira hodi koñese di’ak liutan istória no AMRT hodi manan espíritu nasionalizmu no patriotizmu.

Moises mós informa AMRT realiza konkursu ne’e ho orsamentu rasik ne’ebé mai husi estadu no koopera ho eskola sekundária sira iha Dili, públiku no privadu.

Eskola sira ne’e mak São Pedro Komoro-Dili, eskola 12 Novembru, eskola Paulo VI, eskola Canossa no seluk tan.

“Iha inísiu ami hakarak konvida sanulu maibé depois tan eskola balun iha atividade eskolár ne’ebé sira halo mós iha eskola hodi selebra mós loron ida ne’e entaun iha de’it eskola balun mai mai”, esplika nia.

Nia akresenta tan, estudante sira ne’ebé sai manan na’in iha konkursu puízia ne’e, AMRT la’ós fó osan maibé sei fó de’it livru istória Timor-Leste no literature sira nu’udar prezente.

“Ita la iha prémiu osan. Ita labele bolu ema, atria ema ho osan. Atividade ne’e ita fó prezente hanesan livru de’it”, informa.

AMRT ne’e hahú horseik no termina ohin, tersa (29/8).

Konkorente ida Ana Monica do Rego hateten kontente ho atividade ne’e tanba liuhusi konkursu ida ne’e nia bele hatudu nia talentu.

“Ha’u mós kontente tanba matéria literatura ne’ebé aprende iha eskola ha’u bele aprezenta”, apresia estudante Santa Madalena de Canossa ne’e.

Entretantu tuir observasaun Ajénsia Tatoli, alende halo aprezentasaun puízia husi konkorente sira, partisipante sira mós fó oportunidade hodi halo aprezentasaun literária nomós knananuk Timor-Leste nian inklui seluk tan.

Jornalista: Rafy Belo

Editora: Rita Almeida

HUSIK IDA HATÁN