Ambiente ho Paz Sai Prioridade TAFARA.TL

0
155

DILI (TATOLI)-Media nia papel mak atu informa, eduka no diverte. Tanba ne’e, media online pivadu tafara.tl hakarak promove mós paz no konsiensializa sidadaun sira oinsa atu hadomi ambiente.

Diretór ezekutivu, Fernando da Costa informa katak media ne’e promove paz ho mekanizmu introduz ba jornalista sira atu sensitivu ho “conflict jornalism” ka konflitu jornalizmu liuhusi treinamentu.

“Ida ne’e mak tafara.tl halo hodi kontribui ba paz,” hateten Diretór Fernando da Costa ba ajénsia Tatoli hafoin lansamentu media online ne’e, iha salaun Asosiasaun HAK, Farol, Díli, ohin.

Liuhusi treinamentu, introduz mós peace journalism (Jornalizmu dame) ba ema sira ne’ebé hakna’ar an iha media ne’e. Ho nune’e, notísia ne’ebé sensitivu, koko atu labele upload tanba dalaruma bele kria tensaun.  “Tanba Online  nia iha velosidade, périgu liu duke hanesan diária,”nia informa.

Liga ho ambiente, nia esplika katak media ne’e eziste tanba mai ho inspirasaun maihusi natureza, sira buka ho meius ne’ebé iha hodi kontribui liuhusi informasaun atu leitór sira bele lee.

Seluk mak nafatin liuhusi edukasaun katak fó formasaun, introduz ba jornalista sira oinsa hakerek notísia ho perspetiva ambiente (Environmental perspective).

Introduz, báziku kona-ba meiu ambiente atu sira kumprende bainhira foti isu kona-ba lisu ka meiu ambiente enjerál ka liga ho polítika meiu ambiente nian. “Ida ne’e mak tafara.tl tenta promove,” nia relata tan.

Entretantu, Diretór ezekutivu, Fernando da Costa mós informa katak iha media ne’e tanba maioria voluntáriu, tanba ne’e fó nafatin posibilidade atu sira kontinua aprende nafatin iha fatin seluk hodi eleva sira-nia kapasidade.

“Depois, sira mós iha perspetiva luan la’ós sekedar hakerek de’it,” nia konklui.

(Jornalista: Rafy Belo)

 (Editór : Manuel Pinto)

 

 

HUSIK IDA HATÁN