Administrasaun Públika Labele Hanesan Partidu

0
189
Primeiru-ministru, Rui Maria de Araújo ho Prezidente Komisaun Funsaun Públika (KFP), Faustino Cardoso konversa hela. Foto GPM

DILI, (TATOLI) – Primeiru Ministru, Rui Maria de Araújo fó hanoin katak ita-nia administrasaun públika ne’e tenke baze ho méritu, labele kontinua halo administrasaun públika ne’e hanesan partidu polítiku.

“Ema ne’ebé sai diretór, inspetór, sekretáriu ezekutivu tenke iha méritu tékniku atu halo servisu”, hateten Xefe Governu iha Ministériu Negósiu Estranjeiru no Kooperasaun, Praia dos Coqueiros, ohin.

Nia dehan, tenke hatene uza faktu atu bele fó rezultadu ba definisaun polítika, tenke hatene uza faktu atu jere atividade, programa lorloron iha instituisaun nia laran.

“Prinsípiu importante iha administrasaun públika liliu iha dezenvolvimentu polítika públika mak dezenvolvimentu polítika iha baze ba dadus, evidence base policy maker”, esplika.

Hein katak ho tranzisaun polítika ne’ebé mak liu dadauk, neneik ho neneik, prosesu konstrusaun estadu, nasaun nian sei lori ita ba iha ne’ebá.

Hanesan timoroan, devota serbisu tomak ba dezenvolvimentu. “Ita la presiza ta’uk, ita la presiza moe”, enkoraja.

Bainhira sente la bele, labele aspira ba fatin ne’ebé la bele. Husik ba ema seluk ne’ebé mak bele halo tanba se lae insatisfasaun barak tebes. Tanba la konsege implementa programa ne’ebé governu define, polítika ne’ebé governu define.

La kle’ur tan orden polítika foun sei mosu, maibé orden burokrátika, diretór, inspetór, sekretáriu ezekutivu sei mantein nafatin iha postu traballu, iha trinjeira, iha konstrusaun no estadu.  “Luta kontinua nafatin ba moris di’ak povu nian”.

Prezidente Komisaun Funsaun Públika (KFP), Faustino Cardoso hatutan, akompaña diskursu, lee iha mídia sira, aprezenta preokupasaun oioin husi públiku kona-ba servisu atendimentu públiku.

“Ne’e situasaun ida ne’ebé ezije atensaun husi ita servidór sira (funsionáriu públiku)”, akresenta.

Jornalista: Rafy Belo

Editora: Rita Almeida

HUSIK IDA HATÁN