ACTL Presiza Halo Proposta Ba Governu Hodi Hadi’a Produsaun Kafé

0
64
Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva, partisipa iha lansamentu festivál kafé Timor-Leste 2017.

DILI, (TATOLI) – Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva hatete Asosiasaun Kafé Timor-Leste (ACTL-sigla iha portugés) presiza envolve ema sira ne’ebé ho kbiit agrikultór sira atu halo planu ho proposta konkreta ida di’ak ba Governu oinsá atu hadi’a produsaun kafé iha rai-laran.

“Fatin ne’ebé mak presiza hadi’a, hadi’a uluk no mai ho sujestaun proposta de apoiu ne’ebé Governu presiza tanba agora ita hakarak halo diversifikasaun ekonomia. Diversifikasaun ekonomia la’ós ko’alia ho ibun tutun de’it maibé tenke hala’ó ho planu ne’ebé konkretu, atividade konkreta, tenke hala’o kooperasaun ida ne’ebé di’ak no hala’o servisu ne’e no bele prodús rezultadu”, informa Estanislau durante lansamentu Festivál Kafé Timór 2017 iha Fomentu, ohin.

Tanba ne’e ACTL tenke organiza nia-aan halo di’ak, proposta konkreta, tenke envolve produtór kafé sira tanba kafé buat ida importante ne’ebé hola parte iha diversifikasaun ekonomia.

“Setór ida importante tebes, ita tenke kaer tanba ida ne’e iha ita-nia liman ona, agora oinsá mak atu halo di’ak liután. Ita-nia kafé ne’e sai kultura ida bolu emblemátika tanba ita iha íbridu ida ne’ebé mosu iha ita-nia rai mas íbridu ne’e nia só hetan valór di’ak sé ita utiliza íbridu halo didi’ak no halo produsaun ida ne’ebé di’ak no merkadu tanba marketing (merkadu) ne’e importante tebes”.

Estanislau hatutan kafé Timór bele di’ak liu mas lahalo marketing ida di’ak lavale buat ida no kafé ne’e di’ak liu mas lahetan merkadu di’ak maka tenke buka merkadu nixu kafé espesialidade. “Merkadu nexu sira ne’e mak sei bele fó oportunidade ba ita-nia produtór sira hetan kafé ida kualidade”.

Nune’e asosiasaun mak tenke servisu hamutuk ho produtór kafé sira atu haree ba merkadu internasionál no estabelese folin mínimu hafoin produtór mak sei negosia folin kafé.

“Maibé tenke haree ba situasaun merkadu internasionál nian, labele estabelese presu ida bainhira situasaun merkadu internasionál ladi’ak”.

Tanba ne’e presiza dezenvolve kafé, reabilita kafé no espande kultura kafé nian no kuda kafé mahon sira no tenke matein kafé orgániku bainhira hadi’a plantasaun kafé tanba lahadi’a maka tinan  hirak mai tan kafé sira sei mate hotu.

“Hadi’a plantasaun kafé ne’e buat ida urjente. Ha’u fiar katak Governu sé de’it mai sei halo parseria ida di’ak ho setór privadu liuhusi asosiasaun kafé nian. Asosiasaun tenke brani para servisu ho produtór kafé hotu-hotu ou kooperativa kafé sira ne’ebé agora iha para asosiasaun kafé sai hanesan lian ba reprezenta produtór kafé rai-laran. Ne’e servisu ida ne’ebé la’ós fasil no lori tempu, sé de’it mai Governu,  ha’u sei fó hanoin ba sira katak kafé ne’e parte ida ba diversifikasaun ekonomia”.

Prezidente ACTL, Evangelino Monteiro Soares katak vizaun ACTL voluntária atu serví indústria kafé Timor-Leste ne’ebé mak bele aumenta volume no hadi’a valór folin kafé ba esportasaun no konsumpsaun iha rai-laran.

“Objetivu mak hamoris fali setór kafé Timor-Leste hodi hasa’e volume no kualidade produsaun kafé musan no asegura sustentabilidade produsaun kafé iha Timor-Leste, inklui parte ekonómiku, sosiál, no ambientál iha tempu naruk”.

Evangelino aumeta ACTL mós preparadu ona sobre estatutu asosiasaun nian no iha tempu besik sei hato’o ba Ministériu Justisa para hetan legalidade no sai parseria Governu, ajénsia nasionál no internasionál sira iha Timor-Leste nomós sai mahon ba setór kafé iha Timor-Leste.

Jornalista: Maria Auxiliadora

Editora: Rita Almeida

HUSIK IDA HATÁN