ACTL Lansa Kompetisaun Festivál Kafé

0
32
Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva, partisipa iha lansamentu festivál kafé Timor-Leste 2017.

DILI, (TATOLI) – Asosiasaun Kafé Timor-Leste  (ACTL-sigla iha portugés) lansa ona kompetisaun iha festivál kafé Timor-Leste 2017 ne’ebé hahú iha fulan-agostu no sei remata iha outubru 2017.

Kompetisaun iha festivál ne’e, sei partisipa husi produtór kafé ne’ebé mai husi munisípiu Aileu, Ainaru, Bobonaru, Dili, Ermera, Likisá, Manatutu no Manufahi ne’ebé sei amostra kafé husi kada munisípiu hodi entrega ba ACTL ne’ebé servisu ho entidade sira seluk para prepara di’ak hodi konvida mós peritu sira husi rai-liur hanesan Indónezia, Tailándia, Kanadá no hamutuk ho timoroan sira hodi bele koko kafé nia sabór no kualidade.

Prezidente ACTL, Evangelino Monteiro Soares informa, ohin loron 4 agostu komesa hahú ona kompetisaun no kolleta amostra depois sei enserra iha 28 outubru.

“Hahú lansamentu ohin maibé sei halo lansamentu ba dala-ida tan iha Fatubesi, Ermera hodi loke festivál depois enserra hodi koko kafé iha Maubisi para bele anúnsiu sé mak hetan rezultadu sabór di’ak, mai husi munisípiu ne’ebé no produtór ida ne’ebé”, Evangelino hatete iha Fomentu, Dili, ohin.

Prémiu ba kompetisaun ne’e bainhira munisípiu ida hetan mellór kafé iha Timor-Leste mak sei fó tasa osan U$1000 ba ekipamentu kafé nian no kategoria seluk ba produtór sira seluk mak mellór kafé husi munisípiu ida-idak mak sei entrega tasa no osan U$125 ba ekipamentu kafé nian mós.

“Ita sei laentrega osan ba manán na’in sira maibé osan sira ne’e utiliza sosa ekipamentu ba sé mak orsida sei hetan oportunidade”.

Fundu ba festivál ne’e apoiu husi Asian Development Bank (ADB), Uniited Nations Development Programme (UNDP), MDF, Governu no membru ACTL rasik.

Festivál tinan ne’e ACTL sei kolleta amostra kafé  kuaze 200 liu, husi produtór kafé durante kompetisaun. Amostra ida-idak sei hetan kódigu úniku ida bainhira submete iha kompetisaun ne’e. Kafé 50 di’ak liu ne’ebé avalia husi jurista sira sei avansa ba segunda ronda ho jurista internasionál kuaze nain-neen no nasionál na’in-ualu. Kada kafé husi amostra 50 ne’ebé di’ak liu sei torra loron ida antes ronda finál cupping no sei avalia filafali husi jurista sira hafoin lori ba pozisaun finál.

Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva hatete kompetisaun kona-ba teste sabór kafé tinan 2017 nian foin mak hahú no antes ne’e mós hala’o ona iha tinan kotuk mas agora hahú ho partisipasaun ACTL ne’ebé harii iha tinan kotuk ne’ebé agora kontinua halo servisu.

“Sira iha responsabilidade boot tebes oinsá mak atu halibur produtór kafé sira hodi bele haree ba hadi’a produsaun kafé, kualidade produsaun kafé nian para ita-nia kafé ne’e bele hetan folin iha merkadu internasionál liuliu iha merkadu nixu (mercado nicho)”, Estanislau dehan.

ACTL sei promove kafé ne’ebé mak tama iha kompetisaun no sei fó oportunidade atu fa’an ba kompradór potensiál sira ne’ebé mak vizita Timor-Leste hodi hola parte iha festivál kafé Timór 2017 no sei uza kafé balun husi kompetisaun ba promosaun iha futuru no merkadoria ba kafé Timór.

Jornalista: Maria Auxiliadora

Editora: Rita Almeida

HUSIK IDA HATÁN