iklan

NASIONÁL, DEFEZA

Atua Manifestante, Polísia Kumpri Dever

Atua Manifestante, Polísia Kumpri Dever

Majór Jenerál Lere Anan Timur dadalia ho jornalista sira hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, ohin. Foto Tatoli/Xisto Freitas

DILI, (TATOLI) – Majór Jenerál FALINTIL-Forsa Defeza Timor-Leste (F-FDTL), Lere Anan Timur hateten Polísia Nasionál Timor-Leste (PNTL) kumpri devér bainhira halo atuasaun ba manifestante sira ne’ebé ezije hapara leilaun kareta ba deputadu sira iha área Kampus Universidade Nasionál Timor Lorosa’e (UNTL), parlamentu nia oin, segunda (21/8).

“Ida ne’e atuasaun legál no kumpri dever. Primeiru, proteje aset Estadu no proteje populasaun kbiit laek sira nia sasán. Iha ne’ebá iha Parlamentu no populasaun sira nia sasán. Uza violénsia, polísia tenke responde ho violénsia tanba ne’e nasaun”, Lere hato’o kestaun ne’e ba jornalista sira iha Palásiu Prezidente Nicolau Lobato, Bairu-Pité, kuarta ne’e, hafoin levanta asuntu refere ba Prezidente Repúblika, Francisco Guterres Lú Olo.

Lere realsa demokrasia la’ós tenke ba sunu uma no tuda kareta. Tanba ne’e, nia hatutan, portavóz manifestante sira ne’ebé polísia kaptura ona tenke responsabiliza ba aktu violénsia ne’ebé sira halo.

“Dalaruma ita nia joven sira halo tuir fali nasaun seluk nia problema hodi tuda no sunu maibé tantu membru Parlamentu no universitáriu, sira hanoin didi’ak karik buat ne’e la mosu. Tanba ita iha momentu ida ne’ebé desizivu. Primeiru, ita seidauk fó tomada pose ba membru Parlamentu foun no formasaun governu foun. Segundu, eis líder rezisténsia, Kay-Rala Xanana Gusmão, agora ba trata fronteira tasi. Sosa kareta ka leilaun kareta ne’e problema sekundáriu. Ita bele rezolve ikus”, esplika.

Tuir Lere katak aban bainrua tenki hanoin didi’ak saida maka prioritáriu no saida maka lae. Prioritáriu maka forma Governu uluk lai no soberania tasi tanba deskonfia oras ne’e inimigu aproveita buat hotu-hotu atu atinji sira nia objetivu, ne’e duni tenke kuidadu.

Jornalista: Xisto Freitas

Editora: Rita Almeida

iklan
iklan

Leave a Reply

iklan
error: Content is protected !!