DILI, (TATOLI) – Turista 1900 ne’ebé ohin vizita Timor-Leste hahú ona sira-nia destinasaun ba fatin turístiku sira iha Dili Laran.
Largo Lecidere sai fatin ida ne’ebé preparadu atu turista sira vizita no bele hola produtu lokál balun ne’ebé timoroan sira fa’an.
Debbie Wyatt-Lawes, turista australiana ida ne’ebé foin dahuluk mai Timor-Leste sente kontente no animadu bainhira vízita Timor-Leste tanba ema Timór amigavel tebes.
“Kontente tebes no hanoin loron ida bele mai fali Timor-Leste maibé depende ha’u-nia katuas oan tanba ida ne’e ami-nia vízita ho ró kruzeiru mas kontente bele mai no hetan tais Timór no ha’u gosta tebes, sira fó de’it mai ha’u”, Debbie hatete ho espresaun haksolok iha Largo Lesidere, ohin.
Debbie ne’ebé foin halo nia vizita dahuluk ba Largo ne’e mós hola brinku ne’ebé halo husi tais Timór. “Bonita tebes artezanatu ida ne’e, ha’u hadomi artezanatu”.
Aleinde Debbie, iha turista seluk ne’ebé hola mós tais Timor no produtu seluk ne’ebé grupu sira prepara iha fatin refere.
Bendita Soares husi Grupu Boneka Ataúru hatete, turista sira mós gosta hola boneka Ataúru ne’ebé hatudu mós iha vizita ró kruzeiru nian. “Sira hola ona boneka ho presu dólar 16 no dólar tolu”.
Tuir Relatóriu ne’ebé dezenvolve husi Market Development Facility, The Asia Foundation, Gabinete Ministru Estadu Koordenadór Asuntu Ekonómiku no Ministériu Turizmu, Arte no Kultura katak maski iha limitasaun no dezafiu oioin, turista sira ho porsentu 95 resin husi ró kruzeiru ne’ebé antes ne’e tama ona Timor-Leste sente haksolok no hetan esperiénsia ne’ebé pozitivu.
Turista sira ne’ebé hetan entrevista haktuir katak sei rekomenda Timor-Leste sai fatin turístiku ida ba sira-nia família no kolega sira.
Jornalista: Maria Auxiliadora
Editora: Rita Almeida
Notísia ne’ebé relasiona :
http://www.tatoli.tl/2017/07/ro-kruzeiru-potensial-ba-turiztika-tl/
