DILI (TATOLI)—Prokuradór Jerál Repúblika (PJR), Dr. José da Costa Ximenes informa ba Xefi Estadu Dr. Francisco Guterres Lú-Olo kona-ba prosesa kondenadu Eis Ministru Edukasaun, João Câncio Freitas ba kazu partisipasaun ekonomia iha negósiu iha 26 Jullu liu-ba ne’ebé maka oras ne’e iha ona prizaun Gleno, Ermera.
Iha biban ne´e, Prokuradór Jerál Repúblika mós informa kazu ne’ebé hanesan komete hosi kondenadu sira hanesan Eis Sekretáriu Estadu Obrás Públikas, Arguidu Domingos Caeiro no Funsionáriu Públiku ida iha Obras Públika, arguidu Augosto Inglés, ne´ebé Tribunál desidi kada ema ida sei hetan prizaun tinan tolu fulan neen.
Prezidenti Repúblika, Dr. Francisco Guterres Lú Olo husu ba Prokuradór Jerál Repúblika mantein nafatin pozisaun atu prosesa krime sira ne´ebé iha
“Dezde inísiu to’o públiku preokupa tebes ba kazu Korupsaun. Tanba ne´e, ha´u husu ba Prokuradór Jerál Repúblika nafatin mantein pozisaun atu prosesa krime sira ne’ebé iha, hodi bele la’o ho di’ak liu-tan ba oin,” Lú-Olo dehan bainhira inkontru ho Prokuradór Jerál Repúblika iha Palásiu Prezidenti Nicolau Lobato, Bairu-Pité, Dili, segunda ne´e.
Xefi Estadu sujere ba Prokuradór Jerál katak Ministeriu Públika tenki hamriik iha prinsípiu igualdade hodi aplika lei hanesan ba sidadaun sira hotu.
(Jornalista: Xisto Freitas)
(Editór : Manuel Pinto)
