DILI, (TATOLI) – Primeiru Ministru, Rui Maria de Araújo, ohin, realiza reuniaun ho Konsellu Kombatente Libertasaun Nasionál, hodi esplika saida mak governu halo ona no iha desentendimentu oituan entre jurista Prezidensia Repúblika no governu nian.
“Intrepretasaun juridiku ne’ebé la hanesan entre jurista Prezidensia Repúblika no governu nian tanba governu atu remata ona mandatu, ha’u husu atu antigu kombatente libertasaun sira mai para esplika saida mak governu halo ona no saida mak sei sai preukupasaun husi jurista sira no presiza hadi’a”, tenik Xefe Governu ba jornalista sira iha Palásiu Governu.
Hodi dehan tan, proukupasaun importante mak konsellu kombatente nasionál ne’ebé lei parlamentu nia defini hatete konsellu ne’e sei sai órgaun reprezentativu úniku ba kombatente libertasaun nasionál sira hotu.
Maibé, nia esplika husi pontu vista jurídiku, jurista sira iha Prezidensia Repúblika dehan, sé sai úniku reprezentativu viola ona direitu konstitusionál bainhira ema atu harii asosiasaun no viola liberdade asosiaun.
Adisiona tan, husi pontu vista governu nian haree katak laiha violasaun ida tanba órgaun reprezentativu úniku ne’e iha relasaun ho Estadu, kuandu konsellu ne’e hamrik ona sira mak sai hanesan parseiru úniku ho governu no estadu ba kestaun sira relasionadu ho interese Estadu ninian
“Governu buka halo estatutu ho baze ba lei ne’ebé parlamentu aprova, soke intrepretasaun mak la hanesan nomós iha proukupasaun”, afirma.
Xefe governu ne’e dehan tan, asosiasaun ne’e ida-idak mak sei tur hamutuk mak sei harii konsellu ne’e, para sai parseiru ho governu.
“Asosiasaun ida-idak funsiona nafatin, maibé prokupasaun balun ne’e asosiasaun sira hatete se konsellu ne’e mak úniku reprezentante, sira atu ba ne’ebé, nune’e desententimentu ne’e mak seidauk konsege resolve”, subliña.
Informa tan, konsellu deside ona loron 19 agora atu halo reuniaun para haree kestaun sira ne’e hotu no governu foun mai bele prosesu ba oin.
Jornalista: Julia Chatarina
Editora: Rita Almeida
