iklan

EKONOMIA

Grupu Indústria Ki’ik Presiza Aproxima

Grupu Indústria Ki’ik Presiza Aproxima

Diretór Nasionál Indústria Transformadora, Francisco Xavier.

DILI, (TATOLI) – Diretór Nasionál Indústria Transformadora, Francisco Xavier hatete grupu indústria ki’ik no médiu sira ne’ebé Ministériu Komérsiu Indústria no Ambiente (MKIA) estabelese ona presiza nafatin aprosimasaun tanba bainhira husik uitoan maka ekipamentu ne’ebé Governu apoiu, grupu sira mós husik tiha.

“Karaterístika orijinál Timór nian, ita hotu akompaña kuandu ita dudu nafatin bele la’o mas husik uitoan sira, dalaruma sasán sira ne’ebé apoiu ne’e husik tiha depois sai aat tiha. Tanba ne’e mak ami agora buka maneira oinsá ita halo aproximasaun ida ne’ebé mak di’ak ba grupu sira ne’ebé durante ne’e estabelese atu nune’e mellora tan sira-nia atividade iha indústria ki’ik no médiu”, informa Francisco iha Bairru Pité, horisehik.

Atu nune’e, bainhira liga ba kualidade no kuantidade iha futuru bele tama merkadu ho kompetitivu tanba daudaun Governu apoiu maibé grupu sira utiliza hanesan privadu no ladún utiliza ho di’ak entaun sai problema.

“Tanba ne’e mak liuhusi diresaun ida ne’e, iha tinan 2018 ita hadi’a jestaun no organizasaun para bá oin sira forte no prodús ai-han sira ne’ebé ho kualidade no kuantidade tuir demanda husi merkadu nian”.

Tanba barak mak sei menus koñesimentu no rekursu úmanu, nune’e tinan-tinan ministériu haruka funsionáriu sira bá tuir formasaun hodi bele transfere fali siénsia ne’ebé hetan ba komunidade no grupu sira tuir matéria ne’ebé hetan hanesan halo prosesamentu ba ai-han, soldazen no metodolójika.

“Ami mós espera katak governasaun foun mai sei bele mellora programa ne’ebé iha ona duké ita halo tan buat foun no lakon tempu”.

Sobre grupu sira, liuhusi diresaun ne’e sei halo planu ida ne’ebé di’ak liu, nune’e bele halo atendimentu ida di’ak liután ba komunidade tanba sira presiza informasaun no muda sira-nia mentalidade no hasa’e sira-nia koñesimentu tanba laliu husi faze ne’e maka difisil uitoan ko’alia kona-ba indústria iha Timor-Leste tanba ema laiha skill.

“Ita lafó akompañamentu no formasaun ida di’ak sira difisil atu hasoru indústria foun ne’ebé kompetetitivu no ami mós hanoin ona oinsá hadi’a ami-nia planu sira ne’e hodi nune’e ida ne’ebé mak presiza ami fó atendimentu, presiza estabelese tan no akompañamentu ami sei identifika para aban-bainrua la’o tuir duni nia rekezitu”.

Daudaun ne’e ministériu fó atendimentu ba grupu sira ne’ebé estabelese no hetan apoiu finanseiru maibé barak la’o mas barak mós lala’o tanba ladún jere grupu ho di’ak no menus koñesimentu nomós rekursu umanu. Entantu diresaun seidauk kompila di’ak dadus husi grupu sira ne’ebé sei la’o no lala’o  tuir klasifikasaun tanba sei prosesu hela.

Grupu indústria ki’ik no médiu sira ne’ebé ministériu fó apoiu finanseiru iha tinan 2013 husi Munisípiu Likisá hamutuk 15, Manufahi iha grupu haat, Manatutu no Oekusi iha grupu neen, Vikeke iha grupu ualu, Aileu iha grupu ida, Lautein no Kovalima iha grupu tolu, Ainaru, Baukau, Maliana no Ermera iha grupu lima, no Dili iha grupu 49.

Iha tinan 2015 ministériu apoiu tan grupu husi munisípiu Dili iha grupu 37, Lautein no Aileu tolu, Ainaru, Baukau no Ermera lima, Vikeke hitu, , Manatutu no Bobonaru neen, Kovalima tolu, Oekusi sia no Likisá haat nomós iha tinan 2015 MKIA apoiu grupu seluk husi Munisípiu Dili hamutuk 20, Aileu no Manatutu ida, Ainaru no Baukau haat, Bobonaru, Kovalima, Ermera, no Manufahi lima, Lautein neen, Likisá no Vikeke ualu.

Apoiu finanseiru ne’ebé MKIA fó ba grupu sira hahú 2013 to’o 2015 osan ho montante ki’ik liu mak U$1.500 no másimu U$10.000 no orsamentu ne’ebé apoiu ne’e depende ba atividade ne’ebé kada grupu halo.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!