Zebra FC no Porto Taibessi Kontinua Okupa Zona Dezpromosaun

0
64
Kontra atake entre jogadór Zebra FC (costum metan) no Porto Tabessi (costum mutin) iha Estádiu Malibaka, Maliana. Imajen Mídia LFA.

DILI, (TATOLI) – Ekipa Zebra FC nomós Porto Taibessi FC, okupa nafatin zona dezpromosaun (degradasi) iha jogu Primeira Divizaun Liga Futeból Amadora (LFA) époka 2017, hafoin iha jogu segunda volta, jornada 10, fahe pontus alias impata 1-1, iha jogu ne’ebé maka hala’o iha Estádiu Malibaka, Maliana, sábadu (29/7/17).

Porto Taibessi FC, konsege lidera uluk iha minutu 3, liuhusi penalidade ne’ebé maka konsege ezekuta ho di’ak hosi jogadór Armindo Almeida. Maibé, tama ba minutu 35, Salvador da Silva konsege hatama golu hodi lori ekipa rua impata 1-1.

Ho rezultadu ida ne’e, Zebra FC nafatin túr iha pozisaun 7, ho pontu 8 hosi jogu 10, manán 1, impata 5 no lakon 4. Enkuantu, Porto Taibessi, nafatin okupa pozisaun 8, ho pontu 5 hosi jogu 10, manán 1, impata 2 no lakon 7.

Iha jogu seluk ne’ebé maka hala’o iha loron hanesan (29/7/17), ekipa Carsae FC fahe pontu mós ho Academica FC, hafoin ekipa rua jimpata 1-1, iha jogu ne’ebé maka hala’o iha Estádiu Munisipál Baucau.

Golu hosi Carsae FC, hatama hosi Edit Sávio iha minutu 64. Entretantu, golu hosi Académica FC hatama hosi jogadór Salvador Varela iha minutu 49.

Ho rezultadu ida ne’e maka lori ekipa Carsae FC túr iha pozisaun 3 ho pontu 14 hosi jogu 10, manán 3, impata 5 no lakon 2. Académica FC, nafatin okupa pozisaun 6, ho pontu 10 hosi jogu 10, manán 2, impata 4 no lakon 4.

Jornalista: Xisto Freitas

Editora: Rita Almeida

HUSIK IDA HATÁN