Xina Apoia Yuan Millaun 100 Ba Timor-Leste

0
203
Ministru Negósiu Estranjeiru no Kooperasaun, Hernâni Coelho asina akordu kooperasaun ho Embaixadór Ekstraordináriu no Plenipotensiáriu Repúblika Populár Xina, Liu Honyang. Foto: MNEK

DILI (TATOLI)—Repúblika Populár Xina ho governu Timor-Leste asina akordu kooperasaun ekonómika no téknika hodi reforsa área edukasaun no saúde.

Ministru Negósiu Estranjeiru no Kooperasaun, Hernâni Coelho ho Embaixadór Ekstraordináriu no Plenipotensiáriu Repúblika Populár Xina, Liu Honyang. Foto: MNEK

Ministru Negósiu Estranjeiru no Kooperasaun, Hernâni Coelho informa, apoiu ne’ebé Repúblika Populár Xina apoiu ba Timor-Leste ne’e, Ministériu Saúde (MS) no Ministériu Edukasaun mak sei dezenvolve.

“Totál apoiu ne’e cem milhões yuan, purvolta doze ka quinze millaun dolár” informa ministru Hernâni ba profisionál komunikasaun sosiál iha Ministériu Negósiu Estranjeiru no Kooperasaun (MNEK), Praia dos Coqueiros, Díli, Kinta (13/07) hafoin remata asina akordu.

Pakote sira ne’e, MNEK ko’alia ho governu Xines, depois aprezenta no halo diskusaun, negosiasaun ho ministériu sira, tama iha sira-nia prioridade, sira fó mai no ita halo prosedimentu administrativu no polítiku hafoin entrega fali ba ministériu idaidak.

“Implementasaun ne’e sira mak hatene ona. Atu halo saida de’it sira mak bele halo, ami labele,” nia akresenta.

Embaixadór Ekstraordináriu no Plenipotensiáriu Repúblika Populár Xina, Liu Honyang informa katak apoiu ida ne’e fó bazea pedidu governu Timor-Leste no identifika prioridade rua hanesan edukasaun no saúde tanba área rua ne’e importante.

“Ita harii nasaun, presiza povu ne’ebé mak di’ak, saudável. Povu ne’ebé mak la iha edukasaun, nia labele inovativu, kreativu no labele kontribui ba dezenvolvimentu nasionál,” esplika embaixadór ne’e.

Tanba ida ne’e, governu Repúblika Populár Xina foti área rua ne’e hanesan sesaun apoiu iha tinan ida ne’e.

Entretantu, tuir ministru Hernâni, iha tinan ida ne’e, MNEK asina tiha ona osan hamutuk duzentos e trinte sete  millaun yuan, ba área hamutuk haat ona hamutuk ho Repúblika Populár Xina.

Área ne’e mak hanesan saúde, edukasaun, dijitalizasaun TV, no green depot (fatin rai batar musan, hare musan ka fini sira).

(Jornalista: Rafy Belo, Editór : Manuel Pinto)

 

 

HUSIK IDA HATÁN