Xefe Uma Sívil PR Inagura Dormitoriu Tibar

0
100
SEPFOPE, Ilidio de Jesus Ximenes akompaña hosi Xefe Uma Sívil Palásiu Prezidente kua kek nu'udar simbolu inagura dormitoriu iha Tibar, ohin. Foto Tatoli/Agapito dos Santos

LIKISA, (TATOLI) – Xefe Uma Sívil Prezidente Repúblika, Francisco Maria de Vasconcelhos, reprezenta Xefe Estadu inagura toba fatin (dormitoriu) ba Sentru Nasionál Empregu no Formasaun Profesionál Tibar ho andar rua iha munisípiu Likisa, ohin.

Konstrusaun ne’e harii iha janeiru 2015  no remata novembru 2016, halo husi kompaña G no S ho totál orsamentu $1,581,878.31.

Francisco Guterres Lú Olo iha ninia mensajen ne’ebé lé hosi Francisco Maria de Vasconcelhos hateten, sentru formasaun ne’e iha rekursu úmanu kualifikadu tanba fó ona formasaun ba joven  rihun tolu resin no maioria maka hetan servisu.

ʺFormandu barak husi sentru Tibar nu’udar traballadór kualifikadu, kontribui ona ba projetu investimentu barak, inklui projetu ne’ebé kaer husi nasionál no internasionál”, dehan nia.

Prezidente Repúblika hateten prontu atu fó nafatin apoiu ba sentru formasaun Tibar hodi investe rekursu úmanu  ho kualidade.

Sekretariu Estadu Polítika Formasaun Profesionál no Empregu, Ilidio de Jesus Ximenes informa, dormitoriu ho totál kuartu 32 fahe ba 15 ho kama 60 ba formandu iha primeira andar, no segundu andar iha  kuartu 17  ho kama 34.

Alende ne’e iha mós fasilidade seluk hanesan sala bibilioteka, lavandaria (fase roupa fatin), instalasaun leitura no fatin rekreu.

ʺFormandu ne’ebé hela iha área rurais no Dili atu tuir formasaun hodi hadi’a sira nia kualifikasaun iha nível tékniku profesionál, tanba ne’e sei akumula joven hodi tuir  formasaun professionál iha tibarʺ, hatutan.

Okaziaun ne’e, governante ne’e agradese ba Banku Dezenvolvimentu Aziatiku-(ADB) ne’ebé apoiu ona orsamentu ba konstrusaun.

Sentru Formasaun Tibar harii iha 2002 husi koperasaun governu Portuguesa no iha 2007 entrega ba governu liuhusi SEFPOFE hodi fó ona formasaun ba joven hamutuk rihun tolu resin.

Entretantu, seremonia inagurasaun ne’e partisipa husi segundu vise ministru edukasaun Abel Ximenes, SEPFOPE, reprezentante ADB no seluk tan.

Jornalista: Agapito dos Santos

Editora: Rita Almeida

HUSIK IDA HATÁN