UNTL-Victoria University Diskute ODS Iha Dili

0
71

DILI (TATOLI)-Universidade Nacional Timor Lorosa’e (UNTL) ho Victoria University (VU), Austrália organiza konferénsia internasionál kona-ba Objetivu Dezenvolvimentu Sustentável (ODS), iha Ministériu Negósiu Estranjeiru no Kooperasaun, Praia dos Coqueiros, Díli, kuarta (04/07).

Pró-reitór kooperasaun no parséria, Eduardo Serrão. Foto Tatoli: Rafy Belo

Pró-reitór kooperasaun no parséria UNTL, Eduardo Serrão hateten, ODS nu’udar objetivu ne’ebé nasaun hotu adota hodi hetan dezenvolvimentu no progresu iha nasaun idaidak nia vida.

Mundu liuhusi nasaun unida fó sai ona Sustainable Development Goals, dezde 2015. UNTL ho Victoria University foti tema ida ne’e tanba konsidera importante.

“Ita foin mak tinan rua, Timor liuhusi UNTL komesa ohin tau hamutuk estudante sira, profesór sira, matenek na’in no profesionál sira mai husi NGO, governu, mai halo diskusaun,” hateten pró-reitór ne’e.

Konferénsia internasionál ho tema “Dalan ba Atinje Objetivu Dezenvolvimentu Sustentável” ne’e, aprezenta no halo diskusaun kona-ba objetivu 17 atu transforma ita-nia mundu.

“Ita-nia pozisaun iha ne’ebé ita atu hetan dezenvolvimentu sustentável to’o iha 2030, Timor nia pozisaun iha ne’ebé? Saida mak ita halo atu atinji dezenvolvimentu ida ne’e,” akresenta akadémiku ne’e.

Kona-ba kooperasaun, UNTL halo kooperasaun ho universidade sira barak iha Autrália  inklui Victoria University. Iha kooperasaun UNTL dezenvolve no promove atividade akadémika no sosiál barak.

“Buat ne’ebé ami halo mak exchange students ka interkámbiu estudante sira atu hetan benefísiu,” nia informa.

Tanba tuir nia, aprende de’it husi profesór sira la to’o, aprende de’it husi livru mós la to’o. Liuhusi parseria sira hanesan ne’e ita iha benefísiu.

Ita aprende hamutuk, Austrália mós aprende husi ita, ita mós aprende husi Austrália. Sira nasaun ne’ebé avansada, tuir mai ita-nia nasaun ne’ebé sei iha prosesu dezenvolvimentu nia laran hela, sira aprende kona-ba sistema no prosesu.

“Ida ne’e mak dehan katak ita iha mutual benefit ka benefísiu mútua. Ita la ba husu de’it maibé ita aprende hamutuk ho nasaun sira seluk,” nia haklaken.

Hodi reforsa katak Austrália liliu UV haruka sira-nia estudante mai no UNTL mós haruka nia estudante sira ba iha Austrália tuir kapasidade.

“Tinan-tinan, ita haruka na’in rua ba iha ne’ebá (Austrália) maibé timoroan barak mós estuda iha ne’ebá,” pró-reitór ne’e informa.

Konferénsia konjunta ne’e hala’o durante loron rua, hahú ohin no termina aban, kinta (05/07) ho aprezenta rekomendasaun husi rezultadu diskusaun durante konferénsia no aprezenta mós kona-ba planu atividade saida mak instituisaun akadémika nasaun rua ne’e sei hala’o tan iha futuru.

Konferénsia ne’e partisipa máksima husi akadémiku no estudante husi Austrália no Timor-Leste, sosiedade sívil inklui autoridade seluk ho ema hamutuk na’in atus rua resin.

Konferénsia ne’e nu’udar konferénsia bienál da-lima UNTL-VU ne’ebé hala’o periodikamente entre universidade rua iha sira-nia parseria no kooperasaun.

Informasaun kona-ba konferénsia ne’e, bele asesu mós iha ne’e: https://www.vu.edu.au/about-vu/news-events/events/conference-achieving-sustainable-development-goals-in-timor-leste#goto-academic-objectives=1&goto-overall-objectives=1&goto-sustainable-development-goals=1

(Jornalista: Rafy Belo, Editór : Manuel Pinto)

HUSIK IDA HATÁN