Universidade nu’udar Parseria Foun ba ODS

0
44
John Thwaites. Foto espesiál

DILI, (TATOLI) — Diretór Institutu Dezenvolvimentu Sustentável, Monas, Austrália, John Thwaites hateten universidade ne’e kritikál ba Objetivu Dezenvolvimentu Sustentável (ODS) tanba koñesimentu, solusaun, edukasaun, demonstrasaun no lideransa.

“Universidade presiza ODS hodi demonstra nia impaktu, ODS iha relasaun ho edukasaun. Universidade nu’udar parseria foun ba ODS no new funding ka fundu foun”, esplika iha Ministériu Negósiu Estranjeiru no Kooperasaun, Praia dos Coqueiros, kuarta (5/7).

Tanba ne’e, akadémiku Australianu ne’e aprezenta xave importante haat hodi kontribui ba ODS. Xave sira ne’e mak hanesan peskiza, edukasaun, operasaun no governasaun no lideransa eksterna.

Peskiza katak buka koñesimentu bazea ba evidénsia, buka soluasaun, teknolojia no inovasaun atu apoiu implementasaun ODS. Seluk, hasa’e kapasidade kona-ba peskiza no treinamentu ba peskiza dezenvolvimentu sustentável.

Edukasaun katak hala’o atividade edukasaun nian kona-ba dezenvolvimentu sustentável, serbisu ba ODS, igualidade asesu ba edukasaun, hasa’e kapasidade no mobiliza foinsa’e sira.

Operasaun no governasaun ne’e ita buka dalan hasoru dezafiu sira iha operasaun internál universidade nian, governante sira, polítiku sira, li’a na’in sira (kultura) hamutuk ho komunidade sira no jestór kampus sira.

Seluk, lideransa eksterna ne’e mak halo envolvimentu públiku, hala’o dialógu entre setór sira, halo advokásia ba papel setór no demonstra interese setór sira.

Atu Integra ODS ba iha universidade, iha etapa lima mak hanesan halo mapeamentu ba saida mak ita halo ona, hasa’e kapasidade no sai na’in ba ODS, identidade oportunidade, prioridade no lakuna (gap).

Etapa tuir mai mak integra, implementa no kuda ODS ikus liu mak monitoriza, evalua no komunika kona-ba implementasaun ODS ne’e rasik.

Embaixadór jéneru ba konferénsia internasionál Objetivu Dezenvolvimentu Sustentável (ODS), João Carlos Freitas hateten haree ba futuru bainhira halo investimentu ligadu ho ODS tenke paralelu ho rekursu umanu. “Tanba ne’e importante tebes”, hateten estudante Universidade Nasionál Timor Lorosa’e (UNTL) ne’e.

Entretantu tema ba konferénsia ne’ebé Diretór Institutu Dezenvolvimentu Sustentável, Monas ne’e aprezenta mak: “The Challenge of the Sustenaible Development Goals for education” ka dezafiu Objetivu Dezenvolvimentu Sustentável ba Edukasaun.

Jornalista: Rafy Belo

Editora: Rita Almeida

HUSIK IDA HATÁN